O Diario Oficial de Galicia vén de publicar a resolución do 27 de maio de 2025 pola que se resolven as solicitudes para a concesión das subvencións a clubs deportivos, sociedades anónimas deportivas, seccións deportivas e núcleos de adestramento especializado de Galicia, para o desenvolvemento de actividades deportivas da Xunta de Galicia.
En total, máis de 1.400 entidades serán as destinatarias dos 2 millóns de euros investidos nesta ocasión, acadando o récord de entidades beneficiarias destas axudas e superando en máis dun cento ás entidades do ano anterior.
Como novidade, desde 2024, as entidades poderán recibir un anticipo do 80% da subvención unha vez resolta a solicitude. O pagamento do 20% restante, ou da totalidade da subvención no caso de renuncia ao anticipo, efectuarase unha vez recibida a documentación xustificativa da subvención.
Os NADEs, beneficiarios da liña II destas axudas da Xunta
Máis polo miúdo, a liña I da Xunta de Galicia, destinada a clubs, seccións deportivas e sociedades anónimas deportivas conta cun orzamento de 1,8 millóns de euros (1.790.007 euros) para 1.409 entidades beneficiarias; mentres que a liña II, destinada aos Núcleos de Adestramento Deportivo Especializado (NADEs) e cun orzamento de 209.993 euros contas con oito beneficiarios.
Cómpre salientar que estes oito NADEs (Club BKC Boxeo Kickboxing A Coruña (boxeo), Club Deportivo Natural Sport Videlgi (taekwondo), Club Halterofilia Coruña (halterofilia), Club Kayak Tudense (piragüismo), Real Club Deportivo de La Coruña (fútbol), Club de Loitas Olímpicas Vilalba (loita), Club Fluvial de Lugo (piragüismo) e CX UDC Terra Sports Academy (ximnasia)) corresponden a clubs, polo que van por esta convocatoria mentres que os outros cinco NADEs restantes cos que conta Galicia son os das federacións galegas de atletismo, karate, hóckey, squash e surf, polo que van pola convocatoria de axudas ás federacións.
Protocolo de protección fronte a violencia no deporte
Este ano, como novidade e dentro do compromiso da Xunta de Galicia coa loita contra a violencia, requírese a todas as entidades solicitantes que teñan aprobado o ‘Protocolo de protección dos nenos, nenas e adolescentes fronte a violencia no deporte’, así como que teñan designada á persoa delegada de protección e correctamente inscrita no Rexistro de Entidades Deportivas de Galicia no primeiro semestre de 2025
