Novamente as pistas do CGTD de Pontevedra contarán cunha intensa actividade atlética. Dende o sábado ás 9.40 h. ata o domingo as 15.00 horas desenvolveranse os Campionatos de Galicia de Aire libre Sub16, Sub14 e de Combinadas Sub16. Unha cita clave para poder coñecer as futuras figuras do noso atletismo.
Segundo informa a Federación Galega de Atletismo, “Nesta importante edición están inscritos/as un total de 681 atletas (358 mulleres e 323 homes) achegados e achegadas de todos os recunchos da nosa comunidade para tomar parte nesta gran cita onde a categoría femenina conta cun maior número de participantes”.
Na categoría Sub14, dentro do concurso de peso, contarase ca presenza de Gema Dacosta do Vila de Cangas quen xa se impuxera na Final da Liga Abanca de pista cuberta deste ano.
No campionato de Galicia Sub16 é salientable a presenza da atleta Xela Martínez da Atlética Lucense quen correrá na proba dos 1.500 obstáculos logo de protagonizar unha extraordinaria tempada de pista cuberta que a levaría a batir o récord galego Sub16 dos 1000 m. con 2:53.60 e a tomar parte no Campionato de España absoluto de pista cuberta nos 3.000 m.
Nos valos, participación importante de Enma Sihuang do Franciscanos e Pablo Cudeiro do Ourense Atletismo.
Xa nos concursos, e comezando polos saltos, novamente a lucense Enma Sihuang estará sobre a colchoneta de altura xunto ao campión galego de inverno Marcos Flecha do ADAS Proinor.
Na pértega presenza dos campións Lisa Vosberg do AVA e Oscar Monteagudo da Gimnástica estando no corredor de lonxitude tanto Daniel Loureiro da Atlética A Silva como Nayr Cortegoso do Val Miñor.
Será interesante seguir de preto as evolucións no triplo salto de Adriana Rial do Samertolameu e de Xoel Otero do Mazi.
No círculo de lanzamento de peso contaremos cos atletas do Maderas Barcia Lourenzá Fernando Vallines e de Blanca Pereira do Ourense Atletismo inscrita tanto en peso como en martelo.
No que atinxe ao Campionato de Galicia de Combinadas Sub16 poderemos seguir as evolución dos participantes Bran Núñez do A. Morrazo, Mario Vilar do Ames Atletismo, Miguel Veiga da Atlética Lucense, así como Irene Vázquez do A. Narón e de Marta Lázara do Atletismo Deza na categoría feminina.
Entre a relación de atletas destacados na categoría Sub14 salienta a presenza de Alex Sierpes do Trega quen tomará parte na proba dos 1.000 m. Antón Cillero do Riazor Coruña figura inscrito nas probas dos 80 m. e dos 150 m.
No campionato de Galicia Sub16 contaremos ca participación de varios e importantes campións galegos de pista cuberta deste ano. Entre eles e dando comezo polo medio fondo e fondo saltarán sobre o tartán pontevedrés Jorge Vázquez do Marineda nos 600 m. e Ricardo Negrete do Ria Ferrol nos 1.000 m.
Restriccións de acceso por mor da COVID-19
Como ven sendo habitual, por mor do protocolo de prevención da COVID-19, o aforo de bancada será controlado e limitado a un total de 120 persoas, estando permitido o acceso só a un representante (que pode ser delegado,adestrador ou responsable) por cada club, segundo informa a Federación Galega de Atletismo.
