No seu debut en competición europea, ao HC Deportivo Liceo faltoulle materializar as ocasións das que dispuxo. Ao final do partido, e reflexionando sobre o sucedido na pista do Pazo dos Deportes de Riazor, Stanis García, adestrador das coruñesas apelanba ao refraneiro popular asturián, e avisaba: “Como adoito dicir: En la rula no preguntan, apuntan”.
Para que non coñeza o dito, a rula é a lonxa de Gijón, o lugar onde se fai a subasta de peixe. E o dito popular ao que apelou o técnico liceísta, Stanis García, fai referencia ao feito de que unha vez rematada unha poxa apúntase o prezo e non queda apuntado como se chegou a el. É dicir, que o que conta é o resultado.
Ver esta publicación en Instagram
Con todo, pese a perder 1-3 contra o Martinelia CP Manlleu no seu debut na WSE Champions League Feminina, o HC Deportivo Liceo fixo un bo partido. Adoeceu o conxunto verdibrando de máis puntería á hora de materializar as ocasións das que gozou. O seu contrincante, as catalás do CP Manlleu, foi máis efectivo.
Tal e como explicaba tras o choque Stanis García: “Se miramos o resultado o partido non rematou como esperabamos, pero considero que fixemos un gran encontro. As xogadoras dérono todo desde o minuto cero ao 50. Faltounos a guinda de todos os pasteis no mundo do deporte que foi o materializar a cantidade de ocasións. Coido que foron suficientes para chegar ao tramo final do partido con máis opcións, non dous abaixo. Estou contento polo traballo das xogadoras”.
Na recta final do choque as liceístas buscaron con ansia a meta rival pero sen puntería nas chegadas. O técnico admitía que “as ocasións que buscas no tramo final cando vas dous abaixo son máis co corazón, con empuxe, buscando a heroicidade, seguramente non tan elaboradas como na primeira parte. Non te apreta o crono nin a ansiedade do resultado. Os últimos sete minutos foron máis buscando ese gol que nos permitise entrar no último minuto con opcións”.
O HC Deportivo Liceo disputaba o primeiro partido dunha fase de grupos da WSE Champions League Feminina 2023 que non fixo máis que comezar. Aínda que gañar tería sido mellor, obviamente, neste momento está todo aberto para que o conxunto galego poida acceder á seguinte fase. Así o confirmaba o técnico liceísta, Stanis García, “clasifícanse os dous primeiros equipos. En teoría gañando ao equipo francés os dous partidos estariamos dentro. E tamén habería o partido de volta co Martinelia CP Manlleu e loitar co golaverage“.
Toca visitar ao CP Manlleu na Ok Liga Iberdrola
Mañá mércores 11 de xaneiro, o HC Deportivo Liceo repite rival xa que acude a xogar á cancha do Martinelia CP Manlleu. “Voltamos á Liga. Quédannos dous partidos para rematar a primeira volta, este do mércores e o do sábado contra do Bigues i Riells. Agora o obxectivo é pechar a clasificación para a Copa da Raíña, haberá que puntuar nalgún destes dous encontros”.
O conxunto coruñés ocupa a 8ª praza na clasificación da máxima categoría do hoquei a patíns estatal e o seu contrincante é quinto. “Xa estamos pensando no mércores. Mesmo rival, partido de Ok Liga Ibedrola, entre semana… haino que xestionar e viaxar a Cataluña”.
Co rival fresco na mente o técnico do conxunto coruñés, e maila derrota colleitada, mantiña o prantexamento de partido de cara ao choque na OK Liga Iberdrola previsto para o mañá, mércores 11 de xaneiro ás 21:00 horas en Manlleu. “Toca que recuperar psicoloxicamente ao equipo. Cando hai poucas horas de distancia entre un partido e outro considero que é máis o tema psicológico e a recuperación da carga física. O prantexamento será moi similar ao da Champions League”, explicaba Stanis García.
Stanis García: “Foi un día histórico para o Liceo”
O desta fin de semana foi un partido que quedará para sumar á longa serie de fitos deportivos dun club como o HC Deportivo Liceo. O equipo debutaba na WSE Champions League Feminina recibindo ao Martinelia CP Manlleu no Pazo dos Deportes de Riazor. Foi esta a primeira vez que un equipo galego feminino de hoquei a patíns participaba nunha competición europea. “Foi un día histórico para o Liceo. Tiñamos ganas de que chegara”, explicaba Stanis García.
Debut europeo con derrota do HC Deportivo Liceo ante o CP Manlleu (1-3)
