Este pasado 25 de xullo de 2020, Día de Galicia, a plantilla do primeiro equipo do Viaxes Amarelle FSF certificou sobre a cancha do Pavillón Municipal de Sagrada Familia (A Coruña) o ansiado regreso á Primeira División Nacional Feminina de Fútbol sala. Agora lanzan unha petición de colaboración económica da cidade coruñesa para que a través dun patrocinio o gañado na cancha non se perda por cuestións presupuestarias. No horizonte, a posibilidade de ter que renunciar á praza se non se conseguen apoios para afrontar os retos económicos da tempada 2020-2021.
A pasada foi unha tempada atípica, e marcada polo parón con motivo da pandemia mundial de COVID-19, pero que non minusvalora en absoluto, senón pon máis no alto o logro conseguido polo grupo de xogadoras e corpo técnico. Ata o momento do parón, ocupaban a primeira posición da xeral da táboa cunha vantaxe de 6 puntos sobre o segundo clasificado, e 10 puntos sobre o terceiro, a pesar de levar un partido menos disputado. Ademais de que nos 16 encontros disputados en competición regular non cederon ningunha derrota, contando 14 vitorias e 2 empates; sumado ao equipo máis anotador e con menos goles en contra de toda a competición nacional de fútbol sala feminino.
As condicións non foron as máis propicias, co parón do COVID-19 pero xogadoras e corpo técnico do conxunto herculino asumiron o gran reto de preparar e gañar sobre a cancha un ascenso á Primeira División Nacional de Fútbol sala Feminino, xogánse a súa única carta, a un partido a vida ou morte. Así botaron o resto no play- off exprés.
O plantel do Viaxes Amarelle FSF chegou ao partido decisivo despois de case 5 meses sen disputar ningún encontro, e acumular un desgaste mental de 341 días de tempada, desde que empezaran a adestrar o pasado 19 de agosto de 2019. Xogadoras e corpo técnico renunciaron ás súas vacacións e a estar coa súa familia, nalgúns casos, para poder afrontar este partido e conseguir un logro destacado para o club herculino; algo polo que a entidade da cidade herculina “sempre estará agradecida a estas xogadoras e corpo técnico”, din desde o club.
Acadouse o triunfo e con iso o gañáronse o dereito a xogar na elite do fútbol sala feminino estatal. Con todo, os retos non remata para o conxunto coruñés. As xogadoras e corpo técnico fixeron a súa parte conquerindo na cancha superar a nun un play- off complicado ao Valdetires, e agora a directiva é quen ten un reto que solventar nos despachos.
O conxunto herculino atópase con apenas marxe de reacción para poder planificar a seguinte tempada, a 2020/2021. Xa que segundo borrador do Comité de Competición da RFEF (enviado minutos despois de conseguir o ascenso) teñen previsto dar comezo á competición a primeira fin de semana de setembro.
Sen apenas descanso para preparar a seguinte tempada
Xogadoras e corpo técnico apenas poderán gozar dun merecido descanso, e terán que poñerse a pensar xa no inicio do seguinte curso deportivo.
Se isto fose pouco, a directiva herculina atópase con dificultades para poder formalizar un bloque competitivo. Os 16 equipos da pasada tempada na Primeira División Nacional Feminina de Fútbol sala levan meses preparando o seu plantel, e mesmo moitos deles xa a teñen pechada desde hai máis de dous meses, e planificado o inicio da pretemporada. Por contra, a entidade herculina viuse obrigada a esperar coñecer se conseguía o ascenso de categoría ou non, para poder empezar a planificar.
Se estes non fosen suficientes inconvenientes, a eles súmase un xa coñecido que era que a categoría de ouro é esixente xa por si soa. Este ano amplíase en 4 equipos, e en consecuencia en 8 xornadas máis dando lugar a unha das competicións máis longas dos últimos anos na elite do futsal feminino. Na categoría xa militan outros clubs galegos como: Ourense Envialia, Pescados Rubén Burela, Cidade de As Burgas e Poio Pescamar.
Coa previsible configuración da competición nacional, falamos sempre de provisionais, posto que os períodos de inscrición aínda non se abrirán por parte da RFEF ata o próximo 4 de agosto e perdurará o mesmo ata o 12 de agosto (segundo informacións directas da RFEF nos últimos días); o club herculino tería que realizalos seguintes desprazamentos durante a nova tempada:
- 2 desprazamentos a Zaragoza
- 2 desprazamentos a Alacante
- 1 desprazamento a Telde (Gran Canaria – Las Palmas)
- 1 desprazamento a Melilla
- 1 desprazamento a Esplugues de Llobregat (Barcelona)
- 1 desprazamento a Roldán (Murcia)
- 1 desprazamento a Bilbao
- 5 desprazamentos á Comunidad de Madrid
- 4 desprazamentos dentro da Comunidade de Galicia
Un club con historia herdeiro do laureado Sal-Lence
O Viaxes Amarelle FSF é coñecido por ser un referente no ámbito local, autonómico e mesmo nacional do fútbol sala feminino. Suma xa 23 anos dedicados a este deporte e que se mantivo desde o ano 1997 coa incansable achega dun presidente e Xunta Directiva que puxeron toda a carne no asador por un proxecto de fútbol sala feminino serio para a cidade da Coruña. As laranxas recolleron o testigo na cidade herculina do laureado Sal-Lence.
O Viaxes Amarelle presume de ser un club que “sempre cumpriu cos seus compromisos adquiridos con xogadoras, técnicos e provedores, facendo viable competir no máis alto cun presuposto dez veces inferior ao doutros clubs que competían polos mesmos logros”.
Viaxes Amarelle FSF: “Sempre cumprimos cos seus compromisos adquiridos con xogadoras, técnicos e provedores, facendo viable competir no máis alto cun presuposto dez veces inferior ao doutros clubs que competían polos mesmos logros”.
Estamos ademais diante dunha entidade que se presenta como “clara defensora do deporte de base, apostando polas categorías inferiores, formando xogadoras desde os seus inicios e tendo equipos en categorías benjamín, alevín, infantil, cadete, xuvenil e os seus respectivos filiais senior. E sabendo que o importante é a formación, sempre estivo loitando na zona nobre das súas respectivas competicións, e apostando por adestradores de renome para formar ás futuras promesas do club”.
Viaxes Amarelle FSF: “Somos unha entidade clara defensora do deporte de base, que aposta polas categorías inferiores, formando xogadoras desde os seus inicios”
Aumentan as necesidades nun escenario marcado pola crise provocada pola COVID
O Viaxes Amarelle FSF nunca contou cun gran patrocinador principal que dea soporte a un club destas dimensións. Apoiouse, segundo explican desde o club “en pequenos patrocinios, sobre todo empresas do sector da hostalería, e que debido á pandemia actual, foron un dos sectores máis prexudicados; polo que se dificulta a súa colaboración de fronte a próxima tempada; situación que entendemos á perfección”. Neste sentido, a entidade herculina aproveitar a ocasión para “agradecer o seu esforzo, tempada tras tempada, co deporte feminino”.
Viaxes Amarelle FSF: “Levamos anos tentando chegar a entrar no corazón desas empresas de referencia na nosa cidade (habelas, hainas), para que confiasen en nós para promocionalas, e á vez axudarnos; pero nunca conseguimos entrar con solvencia e sempre recibimos unha resposta negativa”
Comentan desde o club que o Viaxes Amarelle FSF “leva anos tentando chegar a entrar no corazón desas empresas de referencia na nosa cidade (habelas, hainas), e que confiasen en nós para promocionalos, e á vez axudarnos; pero nunca conseguimos entrar con solvencia e sempre recibimos unha resposta negativa; a pesar de saber que temos empresas referencia en moitos sectores económicos”.
A entidade herculina “necesita atopar un patrocinador principal que apoie un proxecto que levan implantado desde o ano 1997, e no 2005 recolleu a testemuña dun mítico club, o Sal Lence FSF, que empezou coa súa actividade na cidade nos anos 80, e nos inicios dos 2000 víase abocado á desaparición total; se non fose polo altruísmo do presidente do Viaxes Amarelle FSF, levando a súa testemuña no tempo”.
A entidade fomenta o deporte desde as categorías inferiores, deixando aberta a ilusión ás novas promesas de que nun futuro poden competir na súa cidade, co equipo que as viu crecer, no máis alto do fútbol sala feminino.
Ampla traxectoria en competicións estatais
Ademais desde ao ano 2009, que a entidade accedeu por invitación á recentemente creada Segunda División Nacional Feminina de Fútbol sala, o club sempre estivo en competicións nacionais. E tras unha primeira tempada de adaptación á categoría, mantendo a categoría, nas tempadas seguintes estivo na zona nobre, ata que na tempada 2011/2012 conseguiron o ascenso á Primeira División Nacional Feminina FS, onde o club mantívose tres tempadas consecutivas.
Na tempada 2015/2016, as coruñesas regresaron á Segunda División Nacional Feminina de Fútbol sala e tras dúas tempadas quedándose ás portas de entrar no play-off de ascenso, á terceira chegou a oportunidade de xogar polo ascenso e as herculinas volverían gañar. Acadaron así regresar á elite na tempada 2018/2019, coa mala fortuna de caer aos últimos postos nas últimas xornadas da competición.
Tras ese mazazo, o club apostou por manter o bloque, e o que finalmente deu froito a que actualmente as herculinas regresen todo o máis alto da competición de fútbol sala feminino.
Son un dos cinco equipos coruñeses en máxima categoría do seu deporte
Actualmente na cidade da Coruña conta con outros catro equipos que están no máis alto dos seus deportes; como son o Depor ABANCA na Liga Iberdrola de fútbol feminino, o Hóckey Club Liceo na OkLiga masculina, o HC Borbolla na OKLiga feminina e o CRAT Residencia Rialta na Liga Iberdrola de rugby feminino.
Viaxes Amarelle FSF: “Ter un proxecto estable e garantista, non é suficiente para que algunha empresa se interese e se implique co deporte feminino da cidade? Solicitamos encarecidamente colaboración dos estamentos públicos, e a implicación do tecido empresarial da nosa cidade. Imos percorrer toda a xeografía española coa súa marca e coa cidade por bandeira”.
Con ese escenario, o equipo galego pregúntase se “ser un constante, estar na zona nobre, cun proxecto estable e garantista, non é suficiente para que algunha empresa se interese e se implique co deporte feminino da cidade. Solicitamos encarecidamente colaboración por unha banda dos estamentos públicos, e por outra banda a implicación do tecido empresarial da nosa cidade. Hai que ter en conta que imos percorrer toda a xeografía española coa súa marca e coa cidade por bandeira”.
A sombra da renuncia da praza planea sobre o Viaxes Amarelle FSF
As palabras que se trasladan desde o equipo coruñés son rotundas: “Se non se consegue pechar ningún apoio máis aos que conta actualmente, principalmente de organismos públicos; a entidade verase encamiñada a ter que renunciar a unha inscrición na Primeira División Nacional Feminina de Fútbol Sala, e non poder participar nunha competición e unha praza que se gañaron con moito esforzo e por méritos deportivos sobre a cancha”.
Viaxes Amarelle FSF: “Se non se consegue pechar ningún apoio máis aos que conta actualmente, principalmente de organismos públicos; a entidade verase encamiñada a ter que renunciar a unha inscrición na Primeira División Nacional Feminina de Fútbol Sala, unha praza gañada con moito esforzo e por méritos deportivos na cancha”.
O club herculino sostén que está interesado “en dar continuidade ao proxecto, pero tamén en seguir cumprindo cos compromisos adquiridos con persoal técnico, deportivo e colaboradores externos; algo que sen sumar apoios, sería inviable economicamente, á vez que moi inxusto coas xogadoras e corpo técnico que tanto esforzo demostraron estes últimos meses; e como non, sería unha decepción para a nosa afección, que sempre foi fiel ás nosas cores”.
