A oitava data da Liga Guerreras Iberdrola saldouse na tarde do pasado sábado cunha bagaxe ben distinta para os dous conxuntos galegos da categoría. O Mecalia Atlético Guardés retomou a senda do triunfo fronte ao pechacancelas nun encontro que lle serviu para reencontrar sensacións, mentras que o Conservas Orbe Rubensa BM Porriño prolonga a súa dinámica negativa lonxe da casa cunha nova derrota en Málaga.
Vitoria balsámica do Guardés para comezar o tourmalet de novembro
O Mecalia Atlético Guardés reatopuse coa victoria no campionato doméstico o pasado sábado tras vencer con comodidade ao faroliño vermello da competición. Deste xeito, o conxunto miñoto solventou con éxito a primeira das cinco probas de lume que lle agardan ao longo deste mes, e fíxoo do mellor xeito posible, pois máis alá dos dous puntos acadados, as xogadoras adestradas por José Ignacio Prades volvéronse a atopar ante o Zonzamas coa súa mellor versión tras a frustrante derrota acadada fronte ao Unicaja Banco Gijón na última xornada da Liga Guerreras Iberdrola.
As guardesas presentáronse no pavillón insular co coitelo entre os dentes, e ao pouco de superar os dez primeiros minutos de encontro xa dominaban o marcador cun amplo 2-6 de vantaxe co que puideron manter o control durante practicamente a totalidade do partido.
Pola súa parte, o conxunto do debutante Patro Barambio, tratou de non perderlle a cara ao encontro e seguiu insistindo ata acadar un parcial de 3-0 que fixo que os asistentes ao Municipal de las Palmeras concibiran a posibilidade de que os puntos quedaran na casa, mais as do Baixo Miño encargáronse de desactivar calquera conato de remontada grazas a unha nova exhibición da gardaredes internacional Miriam Sempere.
A solidez defensiva, xunto ao atino en ataque, liderado pola lateral carioca Gabriela Pessoa con cinco tantos, fixeron valer o bo arranque das galegas para traer os dous puntos da illa e cargarse de moral antes de recibir este vindeiro mércores na Sangriña ao Bera Bera, líder invicto da categoría.
+2 e a seguir.
👏🏻 Gran traballo.#OnosoInfernoéonosoceo 🖤💛 pic.twitter.com/0XS0o4RLG4— Mecalia Atlético Guardés (@Atlguardes_ofic) November 6, 2021
Novo revés para o BM Porriño lonxe do Municipal
O BM Porriño segue a contar por derrotas todos os seus partidos coma visitante nesta tempada da Liga Guerreras Iberdrola logo de caer o pasado sábado por un contundente 36-24 na pista do Costa del Sol Málaga, nun encontro ao que as xogadoras de Ismael Martínez lle perderon a cara moi cedo.
O Rubén Ruzafa acollía un duelo entre dous equipos con dinámicas totalmente opostas. O conxunto local, afianzado na cuarta posición da táboa, chegaba ao encontro cargado de confianza tras vencer nos seus últimos catro partidos, mentras que a escadra porriñesa afrontaba a contenda con moita máis necesidade que o seu rival tras non ser capaz de acadar o triunfo dende o primeiro partido da presente campaña.
A pobre posta en escena das porriñesas no Rubén Ruzafa puxo demasiado costa arriba o choque para un conxunto incapaz de reaccionar ante o incesante dominio das malagueñas, que se foron ao tempo de descanso cunha ampla vantaxe de sete tantos no marcador.
Á saída de vestiarios, o encontro mantivo a mesma tónica, e malia o primeiro parcial de dez minutos que se resolveu cunha igualada a 5 tantos, as branquinegras mostráronse intratables e remataron a faena nos derradeiros vinte minutos cun contundente 11-6.
Con este resultado, o BM Porriño encadea o seu sétimo partido consecutivo sen sumar os dous puntos tras vencer na xornada inaugural do campionato ao Zuazo Barakaldo, e sitúase na décima posición da táboa clasificatoria a tan só dous puntos dos postos de descenso.
O vindeiro sábado, terá unha nova oportunidade de reencontrase co ansiado triunfo na Liga Guerreras Iberdrola fronte as súas seareiras ante o BM Salud Tenerife, nun duelo que servirá para abrir unha fenda coa zona vermella ou pola contra para asomar un pouco máis de preto ao abismo.
El Conservas Orbe Rubensa no puede con un imparable Costa del Sol Málaga https://t.co/75urv4PERa
— Club Balonmano Porriño (@BmPorrino) November 8, 2021
