- O CV Arenal Emevé presentou a súa campaña de abonados 24/25 que ten como lema SOMOS VOLEI
- O acto consistiu na pegada de carteis nas marquesiñas municipais, acto no que participou a alcaldesa Paula Alvarellos.
- A tempada contará con 11 xornadas dobres, con abonos desde 25 euros e prezos atractivos para os afeccionados.
O CV Arenal Emevé presentou esta tarde a súa nova campaña de abonados para a tempada 24/25 baixo o lema “SOMOS VOLEI”.
Os prezos dos abonos van desde os 25 euros. Coa colaboración do Concello de Lugo, a campaña difundirase a través das redes sociais do club, os medios de comunicación e as marquesiñas municipais de información.
A alcaldesa, Paula Alvarellos, estivo presente na colocación do primeiro cartel promocional na marquesiña situada xunto a O Vello Cárcere, acompañando á presidenta do club, Bibí Bouza.
Un ano máis, o CV Arenal Emevé é o único club de España cos seus dous conxuntos na máxima categoría do voleibol nacional.
Os conxuntos, adestrados por José Valle e Higinio Artiles, farán de cada sábado unha auténtica festa do voleibol con 11 xornadas conxuntas que se celebrarán nas seguintes datas: 12 e 26 de outubro, 9, 23 e 30 de novembro, 14 e 21 de decembro de 2024, e 11 e 25 de xaneiro, 8 de febreiro e 8 de marzo de 2025.
O abono individual mantense en 50 euros, mentres que o familiar ten un custo de 70 euros. Ademais, a entrada é gratuíta para os menores de 16 anos. Con esta campaña, o CV Arenal Emevé di “reafirmar o seu compromiso de manter unha política de prezos atractivos para fidelizar á súa afección e seguir promovendo o voleibol na cidade”.
O lema “SOMOS VOLEI”, recolle a esencia do club, di Bibí Bouza
O emblema desta tempada, “SOMOS VOLEI”, recolle a esencia do club, como explica a presidenta Bibí Bouza: “Queremos reflectir que o motor do Arenal Emevé está na base. Desde eses primeiros pasos imos formando a xogadores e xogadoras que acaban competindo nos primeiros equipos. El Arenal Emevé é voleibol, desde a transmisión de valores ata a competición na elite”.
A alcaldesa Paula Alvarellos destacou a importancia do labor que leva a cabo o Arenal Emevé: “Para o Concello, é clave apoiar o labor de clubs como o Emevé na formación en valores dos nosos nenos e nenas. Por iso, poñemos ao dispor destas entidades instalacións e recursos para que poidan levar a cabo esa misión coas mellores ferramentas. O CV Arenal Emevé exemplifica perfectamente por que dicimos que ‘Lugo é Deporte’: é un club modélico que leva o nome da nosa cidade polas pistas máis emblemáticas da elite do voleibol”.
O proceso de abonos poderase realizar a través dos mesmos canles que na pasada campaña: o formulario dispoñible na web do club (cvemeve.com) ou por WhatsApp no número 600 40 62 99.
Ademais, o acceso a este proceso é máis sinxelo grazas ao código QR impreso nos carteis distribuídos pola cidade.
