Co gallo do 8M, Día Internacional da Muller, en As Nosas puxemos en marcha un faladoiro para debater sobre a actual situación da muller no deporte en Galicia. Entre das solucións para mellorar a desigualdade real que se constatou no transcurso da conversa, se plantexaron un traballo de base desde a educación, o acceso das mulleres a postos de poder e, finalmente, levar a cabo cambios na actual lexislación vixente no ámbito estatal.
No faladoiro tomaron parte Mercé Barrientos (presidenta en funcións de Mudega), Bibi Bouza (presidenta do CV Arenal Emevé de Lugo, Helen Roca (ex xogadora internacional de rugby e actual directora deportiva e adestradora do CRAT Residencia Rialta) e Bea Seijas (ex futbolista internacional e agora membro do corpo técnico do Ourense Envialia FS).
Todas as relatoras desde faladoiro sobre a situación de deporte feminino en Galicia destacan a importancia da educación para dar unha volta de 180º a esta situación. “Que desde a educación nos quiten todas esas ideas rancias que temos desde sempre”, declara Seijas. Incluso opina, que ata que a educación básica non mude, todos os avances que se irán conseguindo en favor da igualdade entre o deporte feminino e o masculino serán “espellismos” e “migallas”.
Bea Seijas opina que ata que a educación básica non mude, todos os avances que se irán conseguindo en favor da igualdade serán “espellismos” e “migallas”
“A educación é a clave”, declara Roca, “empezando por conseguir que as rapazas practiquen máis deporte e seguindo por que, unha vez que xa están liadas neste mundo, non se conformen”. A máxima referencia do rugby en Galicia anima ás novas xeracións a ser “teimudas” como foron elas. “Seguimos necesitando referentes para as que veñen detrás”, sinala.
Pola súa banda, Bibi Bouza, presidente do CV Arenal Emevé de Lugo, falou desde a súa experiencia como profesora de secundaria e lanzaba unha alerta: “En primeiro de ESO o 50% dos rapaces practican un deporte e as rapazas nin unha”.
Bibi Bouza: “En primeiro de ESO o 50% dos rapaces practican un deporte e as rapazas nin unha”
Doutra banda, Bea Seijas apunta ao outro dos problemas do deporte feminino para acadar a igualdade, que os postos relevantes e de poder, nos que se conta cun orzamento relevante, non hai mulleres. “Penso que mentres iso non vaia mudando, os cambios van ser moi lentos”.
E Mercé Barrientos, presidenta en funcións de Mudega e unha das fundadoras deste colectivo de mulleres deportistas galegas, non se esquece de mirar tamén á política e á lexislación: “A lei 10/90 que segue en vigor desde hai máis de 30 anos di que deporte profesional no noso país é a Primeira División (de fútbol) masculina, a Segunda División masculina e a División de Honra de baloncesto e todos os demais non somos profesionais, nos paguen ou nos deixen de pagar”.
Barrientos, preguntábase neste primeiro faladoiro de As Nosas: “Será momento de reivindicar que dunha vez alguén tome en serio o problema da muller no deporte e cambie a lexislación?”
____________________________________________________________
As relatoras deste primeiro faladoiro de As Nosas sobre igualdade foron:
- Bibi Bouza, presidenta do Club Arenal Emevé de Lugo. Unha das poucas presidentas de club que hai en Galicia e que ademais conta con máis mulleres compañeiras na directiva.
- Elena Roca, na actualidade adestradora e directora técnica do CRAT Rugby Residencia Rialta, no pasado xogadora internacional con este mesmo club.
- Beatriz Seijas, ex futbolista e membro do corpo técnico do Ourense Envialia. Leva xogando ao fútbol sala desde os 9 anos e hoxe en día como deseñadora gráfica é a artífice das campañas de valores do club ourensán.
- Mercé Barrientos, cofundadora e presidenta en funcións de Mulleres Deportistas Galegas (Mudega). Como deportista acadou o cinto negro 7º DAN de taekwondo, exerceu de xuíza adestradora e presidenta da Federación Galega de Taekwondo e tamén foi presidenta da Unión de Federacións Deportivas Galegas (Ufedega) e vicepresidenta da Federación Española de Taekwondo.
Os avances no deporte feminino, un espellismo para conformarnos
