- A corredora viguesa Soledad Castro Soliño regresa de Irlanda coa prata no Mundial Master de carreiras de montaña
Desenvolveuse na localidade irlandesa de Clommel a disputa do Campionato do mundo máster de carreiras de montaña á cuxa cita acudían dous atletas galegos, segundo informa a Federación Galega de Atletismo.
Na categoría femenina, a corredora do Comesaña Sporting Club Soledad Castro Soliño, lograba conquistar o subcampionato mundial na categoría W55 logo de invertir un rexistro de 50:53 e ceder tan só ante a italina Nicoleta Ferrari por unha estreira marxe de tres segundos.
Con este novo podio a atleta viguesa Soledad Castro, que é unha das máis carismáticas do escenario atlético galego, amplía un notable palmarés entre cuxos logros destacan varios campionatos do mundo e campionatos europeos tanto en pista de aire libre como en campo a través.
O outro representante galego que tomaba parte neste campionato encadrado na categoría M40, Miguel Gómez Rodríguez, remataba no posto 35º cun rexistro de 58:57 nunha proba gañada polo británico Thomas Roach con 42:00.
