O Palacio Municipal de María Pita acolleuo acto de entrega das medallas María Pita, unha iniciativa de novo cuño promovida pola Real Orden de Caballeros de María Pita coa colaboración do Concello da Coruña e na que se galardou a Sofía Toro, Moncho Núñez e Rosa Otero.
A alcaldesa, Inés Rey, acompañada polo mestre-presidente da Real Orden, José Enrique Duarte, presidiu a conmemoración, que tivo lugar esta tarde no Salón Real. Nesta primeira edición da entrega das medallas, as e os protagonistas foron o divulgador científico Moncho Núñez, a deportista Sofía Toro e a presidenta da Asociación Provincial de Amas de Casa, Consumidores e Usuarios, Rosa Otero.
“As medallas María Pita son un símbolo de recoñecemento para veciñas e veciños nados e criados na Coruña, que forman parte da historia e identidade da nosa cidade”, subliñou a rexedora, en alusión a Núñez, Sofía Toro e Otero.
Sofía Toro, campioa olímpica de vela
A deportista Sofía Toro, campioa olímpica de vela en Londres 2012, foi descrita por Inés Rey como “un exemplo para as nenas e nenos da Coruña atraídos polos deportes náuticos, que teñen nela unha muller na que inspirarse, un espello no que mirarse”.
“Que na Coruña haxa, a día de hoxe, programas deportivos municipais con formación náutica como ‘O Atlántico parte de ti’ ou ‘Coruña no mar’ ten moito que ver co legado que deixaron persoas como Sofía. Que as novas xeracións o teñan presente e desexen seguir o seu ronsel é unha gran noticia. Seguiremos traballando para que así sexa”, expuxo.
A alcaldesa tamén puxo en valor o compromiso en materia social amosado por Rosa Otero, a terceira das persoas agraciadas coas medallas María Pita. “Persoas como Rosa, con anos á fronte dunha entidade como a Asociación Provincial de Amas de Casa, Consumidores e Usuarios, con máis de medio século de percorrido, tiveron unha implicación directa na esixencia de avances para A Coruña e, en consecuencia, para a súa cidadanía. Ese compromiso, compartido polo Concello, segue moi vivo”, dixo Inés Rey.
Moncho Núñez foi unha das figuras fundamentais á hora de sentar as bases dos tres Museos Científicos Coruñeses -Casa das Ciencias, a Domus e o Aquarium Finisterrae, todos eles de xestión municipal- e tamén do MUNCYT, “templos da divulgación e a curiosidade polos que ano a ano pasan milleiros de persoas, rapazada e adultos, que aprenden a valorar todo o que a ciencia e a investigación achegan á nosa sociedade”.
Marcos Pérez Maldonado, director dos Museos Científicos Coruñeses, foi o encargado de recoller a medalla outorgada a Moncho, que non puido asistir hoxe ao acto.
