A regatista e campioa olímpica en Londres 2012, Sofía Toro, e a porteira Irene González, son dúas das 34 mulleres ás a cidade da Coruña rende homenaxe a través dun libro. A obra foi presentada co gallo do 8M.
Dous membros do equipo de As Nosas son xustamente os autores da peza que recolle á figura da deportista Sofía Toro. O retrato é obra de Íñigo Rolán e o texto de Silvia Carregal.
No caso da outra deportista referinda nesta recompilación de veciñas ilustres da cidade, Irene González Basanta, as persoas encargadas do perfil son os seus biógrafos, os xornalistas Juan Luis Cudeiro e Rubén Ventureira, que foi ademais, o encargado de coordinar esta obra coral que pon en valor a 34 mulleres da cidade herculina neste o seu primeiro volumen (preparárase unha segunda entrega).
O Teatro Rosalía de Castro acolleu a presentación do libro ‘Cidade das Mulleres. Veciñas Ilustres da Coruña‘, unha iniciativa do Concello da Coruña promovida pola Asociación da Prensa da Coruña e a Fundación Wenceslao Fernández Flórez, que concentra nun libro as biografías de 34 mulleres ilustres da cidade co desexo de lles brindar un recoñecemento. A deportista herculina Sofía Toro, campioa olímpica en Londres 2012, é unha delas.
O obra entregarase como agasallo internacional do Concello da Coruña. Na lista de veciñas ilustres homenaxeadas deste primeiro volume, están:
- Concepción Arenal
- Carmela Arias
- Ángela B. de Soto
- Elvira Bao
- María Barbeito
- Inés de Ben
- Celia Brañas
- Emilia Calé
- Manuela Cambronero
- Sofía Casanova
- María Casares
- Rosalía de Castro
- Mª Luisa Durán Marquina
- Victoria Fernández España
- Fanny Garrido
- Modesta Goicouría
- Irene González
- Teresa Herrera
- Rafaela Hervada
- Carmen Losada
- Rosalía Mera
- María Luz Morales
- Adelaida Muro
- Emilia Pardo Bazán
- María Pita
- Mili Porta
- Bea Rey
- Carmen Salorio
- Elisa Sánchez e Marcela Gracia
- Sofía Toro
- Juana de Vega
- Luísa Villata
- Isabel Zendal.
A alcaldesa da Coruña, Inés Rey, apuntou durante a presentación do libro Cidade das Mulleres. Veciñas Ilustres da Coruña que “neste 8M temos o deber de velar pola nosa saúde, o que non quere dicir que non loitemos pola igualdade real, que non denunciemos a violencia machista e a desigualdade salarial, a desigualdade á hora de ocupar postos de responsabilidade, a cousificación ou a suposta incapacidade para exercer certas ocupacións historicamente reservadas aos homes”.
Inés Rey, alcaldesa, Xulia Santiso, directora da Casa Museo Emilia Pardo Bazán, e Doda Vázquez, presidenta da APC / CONCELLO DA CORUÑAO acto, que se enmarca na programación municipal con motivo do Día Internacional da Muller, contou coa participación da alcaldesa da Coruña, Inés Rey, a directora da Casa Museo Emilia Pardo Bazán, Xulia Santiso, e a presidenta da Asociación da Prensa, Doda Vázquez. O grupo musical integrado exclusivamente por mulleres Sisters in the House” foi o encargado de poñerlle música á presentación.
Grazas a esta publicación, asegurou Inés Rey, “aprendemos aínda máis sobre elas e o mérito é, sen dúbida, de todas esas persoas que as escriben, persoas expertas que profundaron nas 34 biografías para facérmonos ver que todas elas teñen unha característica en común: a súa paixón”. E con paixón, engadiu, “derrubaron prexuízos e convencionalismos impostos e hoxe as 34 son exemplos a seguir”.
Inés Rey sinalou políticas de igualdade que se puxeron en marcha desde a súa chegada a María Pita: “Durante a pandemia o Concello duplicou a capacidade da rede de acollida para que ningunha muller vítima da violencia de xénero tivese que seguir baixo o mesmo teito que o seu agresor, creouse o programa pioneiro cara á mellora da conciliación, o programa de Canguraxe COVID para crianzas que se visen confinadas por un contacto estreito.
A rexedora lembrou que a igualdade de xénero é unha materia prioritaria e necesaria para cambiar a realidade, “unha realidade que se segue antollando difícil”.
A alcaldesa da Coruña lembrou que a pesar dos dereitos acadados polas mulleres ao longo da nosa historia recente, aínda queda moitas barreiras na sociedade para conseguir unha igualdade real. De feito, a alcaldesa referiuse á situación do papel da muller na ensinanza en que “tan só un 10% das personaxes que aparecen nos libros de texto de Primaria son mulleres” ou a porcentaxe de mulleres que ostentan alcaldías en España, “apenas representan un 21,77%”, criticou Inés Rey.
A rexedora pechou o acto lembrando a dona Emilia Pardo Bazán, a que o Concello da Coruña adica este ano unha ampla programación cultural co lema #EPB100 polo centenario do seu pasamento: “Ela defendeu o papel da muller na sociedade do XIX nunha época na que o valor das mulleres radicaba na súa capacidade reprodutiva. Como dixo dona Emilia, todas as mulleres conciben ideas, pero non todas conciben fillos”, sentenciou.
