Coa tempada do 2021 a piques de comezar, a Sociedad Gimnástica de Pontevedra reforza as súas filas con dúas atletas: Inés Blanco e Irene Barbé. A primeira chega ao club pontevedrés para mellorar o seu fondo e a segunda para facelo na velocidade. Ademais, suplen a baixa de varias deportistas que decidiron deixar o atletismo: Joselyn Brea, Blanca Armenteros, María Jiménez e Marisol Diz.
A Sociedad Gimnástica de Pontevedra ten entre os seus propósitos do novo ano manterse un ano máis en Primeira División e segue soñando co ascenso.
Para cumprir con estes obxectivos, chegan estas novas caras ás filas da Sociedad. A primeira delas é Inés Blanco, procedente do Lucus Caixa Rural, que chega para competir nas carreiras de mediofondo, fondo e obstáculos. A galega conta no seu haber con moi boas marcas en 1.500 metros lisos e en 3.000 metros obstáculos, cun 4:44.71 e un 11:15.35 respectivamente.
Por outra banda, para mellorar a velocidade, o club de Pontevedra contará con Irene Barbé, antes no AA Catalunya, que chega cunha marca de 58:65 en 400 metros lisos e sendo subcampioa catalana nesa categoría na competición sub23.
Estas dúas entradas suplirán unha baixa moi importante no cadro pontevedrés. Joselyn Brea deixa o atletismo, despedíndose do deporte como unha das atletas que máis puntos aportaba ao equipo onde competiu durante catro anos.
Brea logrou no seu palmarés un premio á mellor atleta na Copa Iberdrola Plata pola súa carreira dos 3.000 metros lisos cun tempo de 9:23.74, o récord de Venezuela. Tamén foi quen de chegar segunda no 5.000 metros lisos do Campionato de España Absoluto, aínda que quedou fóra do poio.
Esta é a última saída que sufriu a Sociedad Gimnástica. Ademais de Brea, tamén marchan Blanca Armenteros, María Jiménez e Marisol Diz, sendo as dúas primeiras canteranas do club.
Optimismo de Santi Ferre na Sociedad Gimnástica
Como nota positiva, o director da sección feminina da Sociedad Gimnástica, Santi Ferrer, móstrase optimista cara a tempada que entra e afirma que ten “un equipo moi compacto, no que a amizade entre elas é moi importante e nótase no tartán e nas competicións colectivas, polo que competir xuntas é un plus de motivación para elas”.
