Toda vez que o ENCE Marín Futsal ten acadado a súa permanencia matemática na elite por un ano máis, sacudiuse de todo os complexos e permitiuse ata golear a un dos catro mellores equipos da Primeira División do FSF da RFEF. As galegas remataron o seu choque co FSF Móstoles cun 7-3 campeando no electrónico da Raña. Se temos presente que o rival das mariñenses son actualmente un dos catro equipos que ocupan postos de disputa do play-off polo título, o resultado cobra aínda maior relevancia.
A por todas e sen complexos. Así parece que vai ser o resto da competición para o ENCE Marín Futsal. Se alguén pensaba que, conseguido o obxectivo da permanencia, o equipo que adestra Raúl Jiménez ía baixar os brazos e a intensidade, trabucouse. As galegas están dispostas a dar guerra ata o final. Para mostra a goleada que lle meteron a un aspirante ao título, o FSF Móstoles.
Arrincou o partido coas visitantes buscando mandar no 40×20 da Raña. Avisou Pau por partida dobre, e anotou Benete rematando un saque dende o curruncho que botaran Patri Chamorro. Todo iso antes de que se chegase ao minuto cinco de xogo (0-1).
Non foi abondo para frear ás galegas. O Marín tardaba outros catro minutos en empatar. Foi cun gol en propia porta, pero froito dun rexeite dun bo tiro de Ceci (1-1). A propia Ceci dáballe a volta ao marcador anotando o 2-1 cun disparo cruzado rematando un córner.
Foron os saques desde o curruncho e as xogadas de estratexia a balón parado as que deron máis efectividade ao ENCE Marín Futsal. O 3-1 sería tamén cunha estratexia deste tipo. Desta volta anotou Gaby. Con ese resultado chegouse ao descanso.
Á volta de vestiarios o conxunto visitante buscou a reacción optando por unha presión alta, algo que aproveitou o ENCE Marín Futsal para tirar de contragolpes. Así chegaría o 4-1 no minuto 24, tamén de Gaby a pase de María León.
Tirou o FSF Móstoles do xogo de cinco con Rafinha na cancha. Un pase longo da porteira Silvia Aguete cara Jessy facía posible o 5-1.
Chegou así o segundo das visitantes (5-2) a través de Rafinha, pero non mudou o guión do partido que seguía a ter como protagonista principal e indiscubible ao ENCE Marín Futsal. A media ducia xurdiu no mesmo minuto que anotaron as de Móstoles, por se non tiñan claro que non era a súa tarde. Un disparo da porteira Silvia Aguete desde a súa propia cancha. Esta xornada Jozi Oliveira, do Burela fixo xustamente o mesmo. O xogo de cinco permite estas opcións as gardamallas.
O sétimo tanto asinouno María León a dous minutos do final, e a un da bucina, anotaría Celia o 7-3 definitivo aproveitando un erro na saída do balón por parte do ENCE Marín Futsal. Non quedaba tempo para máis.
A vindeira xornada, ocasión para que o ENCE Marín Futsal suba postos
Este resultado non supón ningún movemento na táboa para o ENCE Marín Futsal pero, xunto co resto de resultados da xornada, coloca ás galegas a so catro puntos dos postos de play-off. Pasar de loitar por salvarse, a verse quen de aspirar a entrar na fase final da loita polo título é unha realidade no caso do equipo que adestra Raúl Jiménez.
Tras cinco triunfos consecutivos das de Marín, e o recital de fútbol e goles desta xornada, todo é posible.
O seguinte rival será o Arriva AD Alcorcón FSF ao que visitará a vindeira semana. Trátase, xustamente, do seu inmediato predecesor na táboa. Fantástica ocasión para que as galegas suban postos na clasificación, non si?
FICHA TÉCNICA
7) ENCE MARÍN FUTSAL: Antía, Adriana, Ceci, Jessy e Pau García – quinteto inicial -. Tamén xogaron: María León, Gaby, Dani Fleitas, Mara Fernández, Inés Mayán, Lucía, Marta Gago y Silvia Aguete (segunda portera).
3) FSF MÓSTOLES: Ari; Patri Chamorro, Inma, Celia e Benete – quinteto inicial -. Tamén xogaron: Sara Santos, Rainfha, Myrielen e Clara Chaves.
GOLES: 0-1, min. 4 Benete. 1-1, min. 8 Celia (gol en propia porta). 2-1, min. 9 Ceci. 3-1, min. 11 Gaby. 4-1, min. 24 Gaby. 5-1, min. 32 Jessy. 5-2, min. 33 Rafinha. 6-2, min. 33 Silvia Aguete. 7-2, min. 38 María León. 7-3, min. 39 Celia.
EQUIPO ARBITRAL: Javier Menéndez Nistal e Héctor Vilas López. Recibiron cartón amarelo Benete, Myrielen, no Móstoles e Jessy no Marín.
INCIDENCIAS: Partido da Primeira División do FSF da RFEF disputado no pavillón da Raña no Concello de Marín.
