África Sempere súmase ás outras dúas capitás do Mecalia Atlético Guardés como primeiras pezas do equipo galego da Liga Guerreras de cara ao vindeiro ano. A xogadora confía na capacidade do grupo para remontar o resultado na Challege Cup.
– O primeiro, parabéns pola túa renovación. Ano a ano… e ao final vas vivir, polo menos, cinco tempadas na Guarda. Que che convence para seguir aquí? Tiveches propostas dalgún outro equipo?
SEMPERE: Gústame moito o compromiso que ten José Manuel Silva, o presidente, con todas as xogadoras. É un home de palabra que cumpre aquilo que promete e iso é algo moi importante cando te vas fóra de casa e non sabes que vai pasar.
Tamén encántame a forma na que se vive aquí o balonmán, a afección é incrible e o apoio que recibes de todo o pobo tamén. Ademais, súmanse as amizades fortes que teño aquí, en concreto a de Marisol Carratú, á que considero unha irmá de verdade e pasar tempo con ela gozando de momentos únicos é unha oportunidade que non vou deixar escapar tan facilmente.
Non tiven propostas doutros equipos, ben é certo que me decín pronto.
– Primeira tempada como capitá. Como o levas? Desde o teu papel, que feixes para motivar ao grupo?
SEMPERE: Lévoo moi ben, é todo un orgullo ser a capitá deste equipo. É certo que me daba un pouco de medo porque ao final son responsabilidades que tes que asumir e tes dúbidas de se podes estar á altura ou non. Pero ao final non hai unha soa capitá, somos tres xunto con todo o equipo. Todas remamos na mesma dirección e teño moito que agradecer a Marisol e Lorena por axudarme como o fan. Non fago nada especial, unicamente ser eu mesma. Son unha persoa moi positiva e riseira e gústame moito animar ás miñas compañeiras e iso poida que contáxiese facilmente.
Sempere: “Estanse facendo moi ben as cousas”
– Confírmase tamén a renovación das outras dúas capitás: Marisol Carratú e Lorena Pérez. Tres alicerces básicos do equipo. Que che parece este primeiro paso para o proxecto 20-21 xunto coa continuidade de Prades?
SEMPERE: Paréceme algo moi ilusionante. Creo que se están facendo moi ben as cousas, planificando con antelación e contando con todo o equipo a finais de febreiro. Creo que Jose é un adestrador esixente que sempre quere máis e iso faiche ter resultados no teu traballo. Estou convencida de que as cousas van mellorar, porque xa o están facendo, e todas imos pór o noso granito de area para que suceda.
– O verán pasado o equipo tivo unha renovación moi profunda. Esperabas que o grupo estivese a responder así?
SEMPERE: O certo é que me sorprendeu para ben, marchouse moita xente importante de moitísima calidade e non sabiamos como iamos repornos. A xente adaptouse ben, non está a presión doutros anos, hai un grupo humano excelente, somos un equipo en todos os aspectos e estámolo demostrando. É unha das tempadas que máis estou a gozar independentemente dos resultados.
– Pelexando pola segunda praza da liga, de volta nunha fase final da Copa da Raíña e en cuartos da Challenge. Se tiveses que pedir un desexo para o que resta de curso… cal sería?
SEMPERE: Con este equipo é complicado pedir un só desexo, porque quero gozar de todo. Pero como hai que mollarse gustaríame moito darlle ao pobo e á afección o título da Copa da Raíña. É algo que eles viven moito, sobre todo os máis pequenos e sería un soño para todos nós. Se gañamos se que é facer historia e isto aquí na Guarda non pasa desapercibido.
África Sempere: “Gustaríame moito darlle ao pobo e á afección o título da Copa da Raíña”
– Por último, ves posible a remontada o vindeiro domingo?
SEMPERE: Por suposto que si. Confío no equipo ao 100% , xa o fixemos outras veces. Este equipo caracterízase por non tirar a toalla en ningún momento, por loitar cada minuto? e iso sumado ao apoio e o agarimo de todo o mundo é imposible non crer que é posible.
