Hoxe, sábado 3 de xuño a partir das 18:30 horas, o pavillón da Seca acolle o primeiro partido da semifinal galega dos play-offs polo título de liga da Primera División do Fútbol Sala Femenino da RFEF. Poio e Burela protagoniza a cita co que será un novo Derbi das Costas. O partido emítese ao vivo en Live Vuvuzela.
O futsalfem busca campioas e dúas escuadras galegas aspiran a levantar o título. O primeiro paso neste último treito do camiño polo título 2022-23 que é o do play-off, enfronta as conserveiras do Poio Pescamar e as Guerreiras Laranxas do Pescados Rubén Burela. As primeiras queren saber que se sinte como campioas de liga. As segundas aspiran ao seu cuarto título e a seguir sumando nunha tempada na que xa colleitaron o a Supercopa, a Copa da Raíña e a Copa Galicia.
O Poio Pescamar rematou segundo a liga regular
Nesta primeira eliminatoria o Pescados Rubén Burela FS, que quedou terceiro na clasificación da liga regular, xogará contra o Poio Pescamar FS, segundo na táboa, o seu primeiro partido da semifinal é hoxe sábado día 3 ás 18.30 horas na Seca. Importante encontro no que ambos os dous equipos se xogan ese primeiro punto, clave para comezar con vantaxe a competición.
Despois dunha tempada moi complicada debido ao alto nivel que mostraron durante todo o ano os equipos que ocupan os primeiros postos da táboa, o Pescados Rubén Burela FS, do mesmo xeito que o Poio Pescamar, gañou 23 dos 30 partidos disputados, 3 empates e 4 derrotas. O Poio Pescamar, pola súa banda, empatou 6 e perdeu 1, contra o Futsi Atlético Navalcarnero en Madrid, que rematou líder a liga regular.
Aínda que as Guerreiras Laranxas están facendo unha tempada impecable, con 3 de 3 títulos gañados (Supercopa, Copa da Raíña e Copa Galicia), o Poio Pescamar fixo uns números na competición ligueira de quitarse o sombreiro. Van ser dous ou tres partidos moi intensos, con moita competición e emoción, ademais de polo alto nivel competitivo, por ser xa o clásico derbi galego, o Derbi das Costas.
Dani Sousa: “Estamos orgullosas do feito, pero aínda podemos máis”
Na previa do partido, a futbolista do Poio Pescamar, Dani Sousa, facía unha valoración positiva “da tempada”, advertindo que “aínda non rematou. Temos que valorar o proceso e os pequenos logros que nos serviron para chegar ata aquí. Estamos contentas e fachedosas, pero con gañas de máis”.
Explicaba Dani Sousa que no conxunto conserveiro teñen “unha capacidade de adaptación a todas as situacións. Xestionamos os problemas. Somos un equipo líquido, non sólido. Un equipo sólido non ten esa capacidade de adaptación”.
Dani Sousa, futbolista do Poio Pescamar, advirte que a Liga aínda non rematou e apunta: “Temos que valorar o proceso e os pequenos logros que nos serviron para chegar ata aquí. Estamos contentas e fachedosas, pero con gañas de máis”
A futbolista admitía que para ela “significa moito ser parte desta historia. En tempadas pasadas quedou a espiña de case si, pero non poidemos. É unha gran satisfacción. Temos que estar orgullosas e contentas, pero con ganas de máis, por que podemos máis”.
Ao respecto do rival, Dani Sousa declaraba: “O Burela é un equipo multicampión. Coñecémonos ambos os dous. Temos que controlar as súas fortalezas e atacar as súas debilidade. Temos posibilidades de lograr pasar para a cidade e para o Poio”.
Ver esta publicación en Instagram
Dany Domingos: “O Poio está demostrando esta tempada que está facendo un bo traballo”
Desde as filas do conxunto da Mariña, Dany Domingos fálanos da súa valoración sobre o traballo do equipo durante esta tempada “Primeiro hai que dar o parabén ao corpo técnico polo gran traballo que vén facendo desde o principio ata o momento e nós, aínda que somos un persoal curto, temos o sangue competitivo”. Afírmanos que todos os logros alcanzados este ano foron debido ao equipo, non aos talentos individuais e esa foi a clave.
Ver esta publicación en Instagram
Sobre o equipo rival, o Poio Pescamar FS, “O Poio está demostrando esta tempada que está facendo un bo traballo, nós temos que facer a nosa parte, ser máis contundentes en portería, estar unidas e facer que o resultado estea ao noso favor”.
Dani Domingos, futbolista do Pescados Rubén Burela: “Os alcanzados este ano foron debido ao equipo, non aos talentos individuais e esa foi a clave”
O Burela vai “a polo cuarto título”, di Delgado
O adestrador do Pescados Rubén Burela, Julio Delgado valora o traballo do equipo nesta Liga “se hai que darlle unha nota sería notable ou sobresaínte. Cunha plantilla tan curta como encaramos esta tempada, xogando tres títulos e gañando os tres, non teñen outra nota que non sexa esa. Non traballamos todo o que quixésemos, pero o comportamento e a profesionalidade das xogadoras fíxonos chegar a todas as finais, gañalas e agora estamos nos play-off e imos a por este cuarto título”.
Ver esta publicación en Instagram
Sobre o que debe mellorar o equipo da Mariña “é unha fase de play-off , creo que vai ser bastante diferente este partido ao resto porque agora si que xa non xogas con rede, se perdes ao mellor de tres, poucas opcións tes de cometer erros”, apunta Julio Delgado.
Na opinión do adestrador do Pescados Rubén Burela: “Estamos con máis experiencia neste tipo de partidos e quizais mellorar un pouco a concentración. Está claro que o que hai que facer é traballar e mellorar na finalización, xa que, aínda que foi un bo partido, custounos moito o sábado pasado”.
Julio Delgado, adestrador do Pescados Rubén Burela: “O comportamento e a profesionalidade das xogadoras fíxonos chegar a todas as finais, gañalas e agora estamos nos play-off e imos a por este cuarto título”
Sobre o factor cancha para o equipo rival Julio Delgado apunta: “Sempre é bo xogar na casa, sobre todo coa nosa afección, pero ao final temos que ir a Poio, este encontro e se hai un terceiro tamén, pero ímonos centrar neste primeiro partido que é moi moi importante e se sacamos en positivo ese resultado logo teríamos a volta aquí en Vista Alegre”.
