Os dous partidos de semifinal da Copa Xunta de Galicia de Fútbol Sala Feminino ían disputarse esta fin de semana. O positivo dun contacto directo dunha xogadora do Ourense Envialia adía o cruce destas co Poio Pescamar que se ía disputar no Paco Paz. Pero segue en pé e os bicos das botas dispostos a rematar a gol o Burela Pescados Rubén vs Viaxes Amarelle FSF.
O partido entre lucenses e coruñesas, correspondente á volta da semifinal da XIV Copa Galicia Feminina FS terá lugar hoxe, sábado 10 de outubro ás 19:00 h no Pavillón Municipal Vista Alegre de Burela (con emisión en directo de TVG2). No partido de ida as da Mariña obtiveron unha enorme vantaxe: 1-10, pero hai meses e unha pandemia de por medio desde aquelo.
O corpo técnico do Pescados Rubén Burela, Julio Delgado e Lucas, terán á súa disposición a todo o vestiario a excepción, de Peque e Cely, por lesión, e de Ale de Paz, pola concentración da Selección Española de Fútbol Sala.
Jenny, Burela: “Amarelle ten bos reforzos, somos bloques diferentes ao partido de ida”
Tal e como adiantaba Jenny, do Pescados Rubén Burela, as coruñesas do Viaxes Amarelle teñen “algunhas fichaxes de Primeira, bos reforzos. Somos dous bloques diferentes ao partido de ida. Nós témolo ben encamiñado pero debemos cumprir na pista”.
Ao final do partido a futbolista fará as maletas para acudir a un novo chamamento coa Selección de Portugal. “Estou encantada, con moitas ganas de volver vestir esta camisola despois de 8 ou 9 meses e desexando medirme a Ale de Paz, defendendo a España”, confesaba a 9 laranxa, cos amigables de seleccións marcados para o martes 13 (16.00 horas) e mércores 14 (12.00 horas) na localidade lusa de Quinta dos Lombos.
Para o cadro herculino do Viaxes Amarelle FSF, dirixido por Jorge Basanta, este encontro de semifinal afróntase como un complicado último test da pretemporada, sobre todo pensando en ter que lle dar a volta ao marcador do partido de ida (1-10). Desde A Coruña admiten que será moi complicado facelo, pero as herculinas pensan en dar a sorpresa, ante un rival que vai a por todas na presente tempada, e vén de gañar a competición de liga a pasada tempada.
Á marxe do marcador da ida, non hai que olvidar que estamos, se pensamos na Liga, ante as campioas de do pasado ano e unhas recén ascendidas á elite estatal. Sobre o papel, son bloques con aspiracións diferentes neste curso 2020-2021. O Burela Pescados Rubén, un dos claros aspirantes ao título de Liga. O leva sendo nos últimos anos.
As de Burela levan unha pretemporada con varios encontros e onde o seu tropezo máis grande foi un empate en casa de Poio Pescamar FSF; pero nos duelos que lle enfrontaron a Rodiles FSF, Ourense Envialia FSF e FSF Castro impuxéronse con solvencia no marcador, demostrando o alto nivel ao que está o conxunto da mariña lucense.
O equipo herculino, dirixido por Jorge Basanta, terá polo tanto a oportunidade de medirse nesta semifinal contra un dos rivais máis fortes da competición e ter unha real e dura proba de nivel xusto antes do inicio da Liga.
Para este novo encontro de pretemporada, o técnico do club laranxa ha convocado ás porteiras Leti Rojo, Sandra e Tami Gándara; ademais das xogadoras de pista, Candela, Cris, Sofía, Patri Corral, Yaiza, Martita, María Gómez e Lau Doce. Completarán a convocatoria as futbolistas do filial Carla Martínez e Marta Hermo.
Segundo comunican desde o equipo herculino, afrontan “o partido con ganas, pero con varias xogadoras que non estiveron ao 100% durante a semana por algunhas pequenas molestias, e por iso o partido será un test para probar o estado de forma das xogadoras na semana previa ao comezo da competición de Primeira División Nacional Feminina FS”.
Acceso das seareiras a Vista Alegre
Segundo informa o Burela “o acceso será gratuíto para Abonados Mixtos e Abonados Femininos, que terán parsar por taquilla para recoller o número de asento. Vista Alegre habilitará a venda de entradas (con asignación de asento) dende as 18.00 horas en taquilla, por rigorosa orde de chegada. O prezo de socias/os 2020-21 será de 10 euros e para as persoas non socias, de 15 euros”.
Coa mirada posta de esguello na Liga
Se o Viaxes Amarelle FSF pensa nesta cita como unha proba de lume antes do inicio da competición ligueira, non é diferente para o Burela Pescados Rubén.
Con esta cita, as Guerreiras Laranxas pecharán o calendario de pretempada, co inicio ligueiro previsto para o sábado 17 en Alcorcón (18.00 horas), tras o cambio de formato publicado pola RFEF. Hai que lembrar que a competición contará este curso 2020-2021 con unha organización baseada en de dous subgrupos de nove equipos.
Regresan as da Mariña a Vista Alegre, tras a vitoria colleitada o pasado mércores ante o Castro FSF, de Segunda, no cuarto amigable de preparación, un retorno a casa moi reconfortante.
Sobre o partido contra das de Castro de Rey, a lusa Jenny explicaba: “O inicio non foi bo, pero na segunda parte melloramos moito e tivemos infinidade de ocasións. Atopámonos moi ben”, reflexionaba a xogadora sobre o comezo da semana, agardando que o traballo e a evolucións dos dous meses de traballo de pretempada se poida reflectir unha vez máis sobre a pista.
Hoxe, sábado, terán ocasión ante un rival que regresa esta tempada á elite con toda a ilusión do mundo e a intención clara de non volver perder a categoría, sumándose así ao resto de escuadras galegas da máxima categoría do fútbol sala estatal onde militan esta tempada: Cidade de As Burgas, Ourense Envialia, Poio Pescamar, Burela Pescados Rubén e as retornadas do Viaxes Amarelle.
A Primera Feminina da RFEF, con cinco equipos galegos, xa ten calendario
Un positivo adía a outra semifinal : Ourense Envialia vs Poio Pescamar
Tal e como informábamos desde As Nosas, encontro entre Ourense Envialia e Poio Pescamar, protagonistas da outra semifinal, que estaba prevista para o mesmo día e á mesma hora, tivo que verse suspendido por mor dun caso positivo nun contacto directo dunha xogadora ourensá. Esta circunstancia activa o protocolo COVID-19 e obriga ás persoas implicadas ao illamento social preventido ata contar con PCR negativa.