Hai uns días o equipo das Nosas recibiu un convite moi especial. Unha profe do CEIP Cervo, na Mariña lucense, que coñecía o noso proxecto informativo, preguntounos se nos animabamos a participar nas actividades da súa Semana da Prensa e do 8M.
Falarlles a rapazada tan noviña de muller e deporte, de xornalismo con visión de xénero, en definitiva do que facemos en As Nosas, parecíanos tan complicado como esencial. Así que aceptamos o reto e, sobre todo, a responsabilidade de intentar sumar na tarefa de sementar valores de igualdade aló por onde imos, que é o que lle da sentido a este medio de comunicación.
Logo de compartir unha mañá co alumnado de 1º, 2º e 3º nunha quenda inicial e 4º, 5º e 6º de Primaria na segunda quenda, cremos que podemos asegurar que esa semente xa estaba enraizada e agromando con forza nesas terras da Mariña. Non fixo falta sementar, así que, finalmente, so acudimos a regar unha terra fecunda en valores.
O primeiro reto era conseguir comunicar no seu mesmo idioma. Prohibido empregar palabras complicadas ou conceptos que para alumnado de Primaria fose complicado de interiorizar. Adeus a dicir “androcentrismo” e tamén a empregar frases como “xornalismo con visión de xénero”.
Optamos por explicarlles quen eramos e qué faciamos do xeito máis sinxelo que soubemos. Buscamos xerar dinámicas de xogo e sobre todo animar a nenas e nenos a que preguntasen e participasen sempre que quiseran. E funcionou! (ou iso pensamos…)
A esa cita co CEIP Cervo acudimos Iago Cerezuela e servidora, Silvia Carregal, que como veredes asino esta crónica dun ‘partido’ que foi moi especial para nós.
Cando lles pedimos que se animasen a darnos nomes de mulleres do deporte en Galicia empezouse a recitar a alineación das Guerreiras Laranxas do Burela FS posto por posto. Seguro que sabedes que Cervo está moi preto de Burela, así que moitas das alumnas e alumnos seguían ao mellor equipo do mundo, acudiran a Vista Alegre e eran fans de Peque, de Irene, de Caridad, de Emilly, de Antía, de Jozi… Poderíamos seguir con todo o bloque de xogadoras laranxas, por que damos fe de que as tiñan a todas fichadísimas.
Sorprendeunos a cantidade de deportistas galegas que coñecían e, sobre todo, que aínda que no arranque das conversas o fútbol era o deporte que máis soaba nas respostas, co paso dos minutos apareceron moitas outras disciplinas e escoitamos como citaban nomes como: Teresa Portela, Ana Peleteiro, Belén Toimil ou Julia Benedetti.
Persoalmente quedei enorme e gratamente sorprendida de cantísimo sabían!
Por exemplo, cando preguntamos se coñecían canto lanzaba Belén Toimil, cal era o récord de España que ela posúe, francamente so agardabamos que, no mellor dos casos, alguén dixera “máis de 18 metros”. Como vos quedades se vos contamos que unha rapaza levantou a man e dixo “18,80 mts”. Falou absolutamente segura e tranquila como se fose o máis normal do mundo saber algo que teño para min que non saben nin sequera moitos colegas xornalistas deportivos (eu mesma non sei de memoria todas as mellores marcas). Así que: Ben por vós xentiña de Cervo. E ben por ela, brava!
Ao longo da conversa falamos de como a igual esforzo as recompensas de homes e mulleres, no deporte, non eran parellas. Non houbo dúbidas de que iso era algo inxusto.
Debuxando co alumnado do CEIP de Cervo
Debuxamos deportistas de moitas disciplinas, rugby, fútbol, tenis, baloncesto, natación, baile, si, si, baile… lembrade que o break dance vai ser deporte olímpico en París! No CEIP de Cervo tiñan claro que o baile era deporte, é tal.
Con eses debuxos queríamos comprobar se había paridade debuxos mulleres e homes deportistas. Houbo moitísimos nomes de muller nos debuxos. Atreveríame a dicir que maioría, pero como non fixemos un reconto exhaustivo, e prometimos que iamos ser veraces nas nosas informacións, non imos ser uns falabarato. Faremos xornalismo con rigor e non afirmaremos algo así sen ter os datos contabilizados.
Hai futuro, hai canteira!
Soubemos que nesas aulas de primeiro a sexto de Primaria do CEIP de Cervo hai patinadoras, atletas, futbolistas, ximnastas, e… quen sabe se algún ou algunha xornalista de información deportiva que no futuro poida dar conta do que pasa nunha realidade mediática na que non importe o xénero, senon unicamente os méritos de quen practica o deporte que sexa.
Deixámosvos aquí a peza que subiron ás redes do cole para dar conta da nosa visita. Poderedes ver o ben que o pasamos, o participativas que foron as charlas (grazas mil por tanta pregunta e achega) e tamén, por suposto, o ben que canta Ses 😉 Temazo o escollido como base musical para este reel pola persoa xestora de redes!
Agradecemos que pensárades en nós para unha actividade tan importante. Pasamos unha mañá enriquecedora e ilusionante.
Prezado alumnado de Primaria de Cervo, sodes o futuro da nosa sociedade e coñecervos encheunos o peito de esperanza. Ben por vós! Hai canteira!
Ver esta publicación en Instagram
