As seleccións femininas galegas de Sub 15 e Sub 17 xa coñecen os horarios do encontros da segunda fase do Campionato de España que disputarase en Valencia. A Federación de Fútbol de dita comunidade deu a coñecer o xoves o escenario elixido.
O Estadio Municipal Nuevo Pepico Amat de Elda, en Alicante. O Club Deportivo Eldense xoga neste terreo inaugurado o 30 de setembro do 2012. Está catalogado coa categoría de estadio 2 estrelas pola FIFA. A capacidade do estadio é de 4.036 espectadoras. Conta ademais con 120 asentos no palco.
Valencia será escenario que albergue entre o 14 e o 16 febreiro os encontros correspondentes ao Grupo E. No cal Galicia enfrontarase a Murcia e a Valencia nas dúas categorías.
A primeira fase foi en Lezama (Bilbao) o pasado mes de decembro. As opcións de clasificación para a fase final tanto da Sub 15 que dirixe Susú Cores como da Sub 17 que prepara Quin Valbuena pasan por gañar os dous partidos e agardar resultados favorables.
O elenco Sub 15 regresou do País Vasco con tres puntos dos seis posibles. No primeiro partido perderon ante Cataluña (1-0) pero despois gañaron a Aragón por un 4-0. O que fixo que Galicia poida seguir soñando con clasificarse para a fase final.
A Sub 17 teno máis complicado. A pesar de sumar tamén tres puntos na primeira fase, as de Quin Valbuena apurarán as súas opcións matemáticas ata o final. Acuden a Valencia cun único obxectivo. Pelexar para gañar os dous enfrontamentos.
Horario das seleccións Sub 15 e Sub 17
O cadro dos emparellamentos desta segunda fase do Campionato de España Sub 15 e Sub 17 de Seleccións Autonómicas é o seguinte:
- Sub 15: Día 15 de febreiro, ás 10.30 horas, Galicia – Murcia.
- Sub 17: Día 15 de febreiro, ás 12.30 horas, Galicia – Murcia.
- Sub 15: Día 16 de febreiro, ás 10.30 horas, Valencia – Galicia.
- Sub 17: Día 16 de febreiro, ás 12.30 horas, Valencia – Galicia.
