Non puido despedirse cunha vitoria a Selección Galega Sub 15 Feminina na última xornada desta 2ª fase. As pupilas de Vicky Vázquez despedíronse do Campionato de España con outra derrota, nesta ocasión ante a anfitrioa, Valencia. As galegas, chegaban sen opcións á última xornada pero querían marchar de Elda cun bo sabor de boca. Por desgracia non foi así, e acabaron caendo ante o potencial ofensivo do equipo local.
De inicio foi a selección valenciana a que quixo facerse coa pelota e meterlle ritmo ao encontro. As de Vicky Vázquez, pola súa banda, saltaron ao terreo de xogo co obxectivo de sumar os tres puntos e pechar a súa participación no Campionato de España cun sorriso.
Con todo, a contenda púxoselle costa arriba ás nosas no minuto 19 cando chegou o primeiro gol do choque obra de Raquel Gil. A futbolista valenciana rompeu ao espazo, encarou a Reigo e puxo por diante ao combinado preparado por Andrea Esteban.
Co paso dos minutos Galicia asentouse no partido e dispuxo de dúas boas opcións para empatar nas botas de Lucía Otero, pero ambos os seus lanzamentos foron rexeitados pola porteira local Claudia Bermejo. Co 1-0 chegouse ao descanso.
Tras o paso por vestiarios a decoración do partido cambiou e as nosas estiveron máis cómodas. Malia todo, o ritmo do partido foi caendo co paso dos minutos dado o desgaste físico e as altas temperaturas.
Na recta final, e co partido aberto, Galicia quedou en inferioridade pola expulsión con cartón vermello directo a Paula Novo. Nesa acción, Laura Martínez anotou o definitivo 2-0 cun lanzamento de falta directa. Galicia pecha con esta derrota a súa participación no Campionato de España con tres puntos no seu casilleiro.
https://twitter.com/futgal/status/1228767620817616896
VALENCIA 2-0 GALICIA
FICHA TÉCNICA
VALENCIA: Claudia Bermejo; Laura Martínez, Lucía González, Olga (Elena Orriols, min. 74), Esther, Raquel Gil, Ainhoa, Lucía Romero, Marta López (Alma Velasco, min. 53), Elena Núñez e Alba Grau (Escoms, min. 59).
GALICIA: Reigo; Abril, Paula Novo, Sara, Antía (Elena, min. 51), Carmen (Nuria Sánchez, min. 67), Laura Testa (Candela, min. 51), Marta Rico, Fara, Sharon (Clara, min. 57) e Lucía Otero.
ÁRBITROS: Carlos Albaladejo, asistido nas bandas por Adrián García e Francisco Latorre. Amosaron cartón amarelo a Carmen e cartón vermello directo a Paula Novo no minuto 79.
GOLES: 1-0 Raquel Gil (min. 19). 2-0 Laura Martínez (min. 80).
INCIDENCIAS: Partido correspondente á última xornada da 2ª Fase do Campionato de España xogado no estadio Nuevo Pepico Amat.
