A Selección Galega Sub 17 non quere pensar na calculadora. O elenco dirixido por Quin Valbuena plantouse na segunda fase deste Campionato de España consciente de que o soño da súa clasificación para a Fase Final pasaba por gañar os seus dous compromisos en Elda e esperar resultados. O primeiro paso xa o deu esta mañá tras a súa importante vitoria ante Murcia (3-0) no Nuevo Pepico Amat de Elda.
Estes tres puntos, os tres goles e unha diferenza de goles positiva deu moita vida ás nosas, que se xogarán a clasificación para a Fase Final este domingo ante a anfitrioa, Valencia, un combinado que onte caeu precisamente ante a rival das galegas na xornada deste sábado.
Galicia saíu moi enchufada desde o primeiro minuto de xogo e mostrouse superior ao seu rival. Froito desta superioridade chegaría o 1-0 que encarrilaba o camiño no minuto 18 obra de Charín. A xogadora galega mandaría ao fondo da rede un bo servizo de Noela, que viña de completar unha gran acción invidual.
As de Quin Valbuena sabían que necesitaban máis goles para continuar soñando e antes do descanso Ana Toubes marcou un dos golazos do campionato desde fóra da área. Co 2-0 chegouse ao descanso.
O ritmo do partido baixou na segunda metade froito das altas temperaturas e do esforzo dos dous equipos durante os primeiros 45 minutos. Malia todo, as nosas continuaron apretando y Noela anotaría o 3-0 nunha rápida transición ofensiva. Antes do final do encontro, Laura Cetina tivo nas súas botas o 4-0 cun lanzamento de penalti que detivo a porteira murciana Andrea.
Con esta vitoria Galicia sub17 segue con opcións de asinar a súa clasificación para a Fase Final do Campionato de España. A gran cita para as nosas terá lugar este domingo ás 12.30 horas ante Valencia.
FICHA TÉCNICA
GALICIA: Nuria; Sara Álvarez, Elena, Aroa Guerra (Nerea Lombardero, min. 60), Laura Cetina (Ana López, min. 82), Noela, Inés, Ana Toubes (Aroa González), Charín, Paula e María.
MURCIA: Andrea; Desi, María Sánchez, Saray, Silvia Lloris, Lía, Teresa, Patricia Miñano, Lidia Díaz, Lidya e Mireia.
ÁRBITROS: Ángel Navarro, Daniel Esteban e Emilio Luis López. Amosaron un cartón amarelo a Aroa González.
GOLES: 1-0 Charín (min. 18). 2-0 Ana Toubes (min. 30). 3-0 Noela (min. 52).
Clasificación despois da segunda xornada.
