Moito orgullo e corazón deixou a Selección Galega Sub 17 nesta última xornada da 2ª Fase do Campionato de España. As de Quin Valbuena xogábanse a clasificación para a fase final ante a gran anfitrioa despois dun gran desgaste na xornada anterior. O combinado que conseguise os tres puntos, pasaba. O gran beneficiado do empate foi a selección de Navarra que conseguiu o pase para a fase final.
O partido tomou cor local xa no minuto 8 grazas ao tanto de Verita Rico, que aproveitou un balón en longo para meter a testa e poñer por diante ao colectivo laranxa. Malia ao golpe, as nosas non baixaron os brazos e foron arriba na procura da igualada, que chegaría no 19 da primeira metade obra de Aroa Guerra. Co empate comezou un novo partido, marcado pola tensión que había no terreo de xogo tendo en conta que quen gañara estaría na fase final do Campionato de España.
O elenco de Quin Valbuena foi acusando o desgaste físico do día de onte e antes no descanso apareceu Fiamma para poñer de novo por diante no electrónico do Nuevo Pepico Amat a Valencia. Co 2-1 chegouse ao descanso. O mellor aínda estaba por chegar na segunda metade. O desgaste físico castigou moitísimo ás dúas seleccións. Así, e cando peor pintaban as cousas para Galicia, apareceu de novo Aroa Guerra para marcar o tanto do empate.
Co 2-2 no marcador e cos resultados que se daban no resto dos campos, o Valencia-Galicia converteuse nunha final. O gañador pasaría á Fase Final do Campionato de España.
O medo e o respeto imperaron na segunda metade tras o empate das nosas. Galicia tuvo o 2-3 nunha gran transición e Valencia tamén puido gañar o partido e asinar a clasificación con dúas claras ocasións na recta final e cun disparo ao longueiro incluido. Con este resultado as dúas seleccións quedaron ás portas da fase final.
VALENCIA 2-2 GALICIA
FICHA TÉCNICA
Valencia: Lucía Palomares; Irene Miguélez, Estela, Nuria Martínez, Yolanda (Nuria Morell, min. 51), Gema Climent (Lucía Cánoves, min. 78), Ainhoa Bascuñán, Fiamma, Natalia (Carmen, min. 59), Alicia Silvar (Thais, min. 70) e Verita Rico.
Galicia: Nuria; Sara Álvarez, Elena Pérez, Aroa Guerra (Nerea Lombardero, min. 59), Laura Cetina, Noela, Inés (Aroa González, min. 36), Ana Toubes (Nerea, min. 78), Charín, Paula e María.
Árbitros: Jonathan González, Joshua Vicedo e Rubén Granero.
Goles: 1-0 Verita Rico (min. 8). 1-1 Aroa Guerra (min. 19). 2-1 Fiamma (min. 41). 2-2 Aroa Guerra (min. 49).
Estadio: Nuevo Pepico Amat.
