Galicia xogaba en casa esta fin de semana o Campionato de España de Fútbol Sala. Betanzos acollía os dous encontros, primeiro foi o turno das máis xóvenes e posteriormente xogou a sub 19. Ambas contra Castela A Mancha e ambas acadando unha gran vitoria para despedir a fase previa.
A Selección Galega Sub 16 marcha cun sonriso de Betanzos a pesar da eliminación
Maila non poder acadar a clasificación para a fase final, as de Chipi derrotaron a Castela A Mancha por 3-1 e aos cinco minutos as galegas daban o seu primeiro aviso cun tiro de Sol ao pau.
Chegaba o minuto 12 e as galegas non perdoaban. Nunha boa mostra de efectividade, Alba estreaba o electrónico cun gol ao segundo pau para culminar unha gran xogada de equipo e na seguinte xogada Carmen facía o 2-0 cun gol desde dez metros á escadra ao primeiro toque. A pesar da igualdade inicial, as galegas poñían ventaxe no marcador.
Con estes dous Castela A Mancha non encontraba o seu sitio no partido, algo que intentaron aproveitar as galegas para ampliar as diferenzas no marcador pero, malia as aproximacións que tiñan as galegas a área visitante, non chegaban con perigo, polo que con este 2-0 o encontro chegouse ao tempo de lecer.
Na reanudación as cousas non podían empezar mellor para as nosas, porque na primeira xogada sorprendían cun gol de Fara ao segundo pau, conseguido o 3-0. Castela A Mancha tiña que cambiar o plantexamento do seu xogo por completo, obrigadas a subir liñas para intentar recurtar as distanzas, o que facía que, por momentos, o xogo fose de ida e volta, pero novamente case sen ocasións.
Co paso dos minutos, Galicia ía gañando novamente máis posesión do esférico e tendo Carmen unha boa ocasión ao quedarse no man a man diante da gardamallas Elena. As cousas se compricaron porque, tras un erro defensivo, dúas xogadoras de Castela A Mancha se quedaban soas diante de Uxía e Eva non perdoaba ao segundo pau, anotando o 3-1.
As visitantes medraron tras este gol e chegaron mais ocasións do combinado manchego. Jimena saltaba a pista coma porteira-xogadora, algo que revolucionaba o xogo, porque tiña dúas claras ocasións para recurtar diferenzas, cun tiro desde o borde da área que detía Uxía e outro desde a frontal da área ao longueiro. As galegas o pasaban mal atrás, porque Blanca tamén tiña outra oportunidade cun tiro na frontal por raso que despexaba Uxía cunha gran man. As de Chipi souberon sufrir e lograban ter o balón nos instantes finais para acadar chegar ao pitido final coa vitoria por 3-1.
Con este resultado, Galicia finaliza esta fase previa do Campionato de España con 7 puntos, no segundo posto, por detrás de Madrid. As nosas realizaron unha gran competición durante estes tres días en Betanzos e poden estar orgullosas do traballo feito.
FICHA TÉCNICA
GALICIA: Uxía, Carmen, Andrea, Alba, Fara. Tamén xogaron: Julia, Otero, Lucía, Andrea, Sol, Antía e Carla.
CASTELA A MANCHA: Elena, Clara, Blanca, Rocío, Elena. Tamén xogaron: Jimena, Aime, Eva, Lidia.
COLEXIADOS: Corral Martínez e Darriba Vilamor, xunto con Fidalgo Días coma árbitro asistente (Comité galego). Amonestaron a Eva en Castela A Mancha.
GOLES: 1-0 Alba min.12, 2-0 Carmen min.12, 3-0 Fara min.21, 3-1 Eva min.34
Pavillón Municipal de Betanzos
A Madrid séntalle ben xogar en Miño
Ao mesmo tempo que se xogaba en Betanzos tiña lugar o encontro entre Madrid e Ceuta no Pavillón Municipal de Miño, onde as madrileñas precisaban a vitoria para poder acceder á seguinte rolda. As da capital fixeron os deberes e conseguiron vencer sen grandes complicacións por 7-1 e con iso, conseguir o primeiro posto que da o pasaporte para a fase final do Campionato de España de selección autonómicas sub 16.
A Selección de Galicia Sub 19 gaña non últimos segundos pero non pode pasar de ronda
Betanzos foi testigo dun gran encontro entre Galicia e Castela A Mancha, onde o combinado galego conseguía unha vitoria nos últimos segundos por 6-4.
As galegas poñíanse por diante moi cedo, e as 25 segundos anotaba o primeiro cun gol de Iraia desde a frontal da área por raso. A pesar de este gol do combiando galego, os primeiros minutos de xogo foron moi igualados sobre a pista, pero sen ocasións en ninguna das dúas porterías.
Sen case tempo para saborear o gol inicial por parte das nosas, o combinado manchego lograba empatar grazas a un misil de Noelia desde o borde da área que impactaba primeiro no pau e entraba dentro da portería.
As de Jorge Basanta tentaron manter a calma e dominar o partido pero as cousas complicábanse cando preto do minuto 13, a visitante Natalia quedábase soa na frontal da área, enviando o balón o pau e tan so uns segundos despois Elena facía o 1-2 cun tiro desde a borda do área por raso.
Isto non facía cambiar o estilo de xogo das galegas, que golpearon de novo grazas a un tanto de Cris nunha falta lateral. Un minuto despois a propia Cris voltaba as tornas e facía o 3-2 cun gol desde quince metros.
As galegas querían dar un novo paso adiante e grazas a unha boa xogada de equipo María Estevez lograba facer o 4-2 cun gol de tiro cruzado por raso desde o borde da área e tan so un minuto despois a propia xogadora facía o 5-2 ao culminar outra gran xogada colectiva ao segundo pau.
Castela A Mancha non baixaba os brazos e volvíase a meter no partido nun contragolpe, logrando quedarse soa Noelia no borde da área e anotando por raso o 5-3. Rebeca anotaba o 5-4 para unha recta final extraordinaria.
O xogo volveuse igualar sobre a pista, cos dous equipos querendo non cometer erros, centrando o seu traballo na defensa, onde Teresa estivo preto de rachar os esquemas de Castela A Mancha cun disparo desde a frontal da área que rozaba o pau. As manchegas tamén querían buscar o empate, polo que Elena saía a pista coma porteira-xogadora, obrigando as galegas a replegarse na súa área, pero conseguía a gardamallas Lucía facerse cun esférico e non o dubidaba tirando directamente a portería desde a súa área e conseguindo o definitivo 6-4.
Con este resultado Galicia finaliza a súa participación nesta fase previa do Campionato de España con 6 puntos no seu casilleiro.
FICHA TÉCNICA
GALICIA: Lucía, Teresa, Cris, Iraia, Ame. Tamén xogaron: María Estévez, Canolich, Nuria
CASTELA A MANCHA: Marta, Irene, Elena, Rebeca, Noelia. Tamén xogaron: Eva, Yanira, Natalia
COLEXIADOS: Cardero Rodríguez e Guntín Garrido, xunto con Barreiros Novelle coma árbitro asistente (Comité galego). Amonestaron a Cris e Canolich en Galicia.
GOLES: 1-0 Iraia min.1, 1-1 Noelia min.7, 1-2 Elena min.12, 2-2 Cris min.15, 3-2 Cris min.16, 4-2 María Estévez min.22, 5-2 María Estévez min.24, 5-3 Noelia min.26, 5-4 Rebeca min.27
Pavillón Municipal de Betanzos
Madrid logra o seu pleno de vitorias ante Ceuta no pavillón de Miño
O Concello de Miño recibía as selección de Madrid e Ceuta. O partido era intrascendente a efectos clasificatorios ao ter Madrid asegurado o primeiro posto de grupo e a clasificación para a fase final tras o encontro do sábado, pero isto non facía que as madrileñas se confiasen ou baixasen o pistón, logrando a victoria por un contundente 9-0, facendo pleno de victorias nesta fase previa.
