Acabouse o soño. A Selección Galega Sub 15 Feminina dixo durante a mañá de hoxe adeus á posibilidade de clasificarse para a Fase Final do Campionato de España tras caer ante Murcia (1-2) no primeiro partido das galegas nesta segunda fase que se celebra en Elda.
O combinado dirixido por Vicky Vázquez, chegaba á cita con moitas opcións de asinar o billete para a Fase Final tras a boa primeira fase que completara en Lezama (Bilbao) pero non foi así. As galegas caeron nun partido marcado polas accións a balón parado. Dous saques de esquina en contra acabaron condenando ás nosas.
Tras un primeiro cuarto de hora de tanteo entre as dúas seleccións chegaría o primeiro gol murciano. Nun córner, a cobertura galega non puido despexar a pelota e Fara, no seu intento de afastar o perigo, non puido evitar que a pelota acabase no fondo da súa propia portería. O 0-1 foi un mazazo.
Con todo, as de Vicky Vázquez souberon repoñerse do golpe e na recta final da primeira parte apareceu a maxia de Marta Rico para empatar a contenda cun golazo. Co empate no electrónico chegouse ao descanso. Tras o paso por vestiarios a decoración do envite apenas variou e noutro saque de córner, e nunha acción moi similar ao do primeiro gol de Murcia, chegaría o definitivo 1-2 que acabaría coas esperanzas galegas.
Mensaxe para Susú
No gol de Marta Rico, as xogadoras tiveron un detalle coa súa exadestradora, Susú Cores. A galega deixou de estar ao fronte da selección sub15 e do Boimorto para poñer rumbo a Ecuador e afrontar a súa primeira experiencia profesional comoa destradora.
As xogadoras tiñan unha mensaxe moi especial impreso nas súas camisetas: “Muchas gracias por todo, Susú. Mucha suerte. Te deseamos lo mejor”. Un gran detalle das galegas coa nova adestradora de Las Dragonas de Ecuador.
Con esta derrota, Galicia di adeus á posibilidade de disputar a Fase Final. Malia todo, a Selección Galega Sub 15 terá que xogar este domingo ante a anfitrioa, Valencia, o segundo encontro desta segunda fase. A cita será ás 10.30 horas no Nuevo Pepico Amat.
https://twitter.com/futgal/status/1228598711514738689
FICHA TÉCNICA
GALICIA: Martina; Abril, Paula Novo, Sara, Carmen, Laura Testa (Sol, min. 74), Laura Otero, Marta Rico, Elena, Candela (Sharon, min. 53) e Fara (María Lama, min. 60).
MURCIA: Irene Zapata; Nerea (Estefanía, min. 51), Pilar (Lina, min. 63), Blanca Martínez, Cobos, Ángela Romero, Daniela, Vega, Inma Dolera, Mireya (Patri Pedreño, min. 73) e Victoria.
ÁRBITROS: Jonathan González, asistido nas bandas por Joshua Vicedo e Rubén Granero.
GOLES: 0-1 Fara en propia porta (min. 22). 1-1 Marta Rico (min. 39). 1-2 Blanca Martínez (min. 66).
Así queda a clasificación despois da segunda xornada:
GALICIA 1-2 REGIÓN DE MURCIA
