- Éxito da Selección Galega Sub-10 de futsalfem ao facerse co Campionato de España baixo da batuta de Belén Feal.
As nosas tocaron o ceo en Murcia. O 11 de maio de 2025 xa forma parte da historia do fútbol sala galego, aseguraban desde a RFGF ao informar que as futbolistas da Selección Galega, dirixidas por Belén Feal e o resto do corpo técnico, proclamáronse campioas de España en San Pedro del Pinatar.
A Selección Galega Sub-10 vencía con autoridade a Andalucía nunha competida final do estatal Sub-10 feminino de fútbol sala.
Aos poucos minutos, Vega marcaba o 1-0 para o conxunto galego, que ampliaba a súa renda pouco despois cun precioso tanto de Nayara no segundo pau.
A pesar diso, Andalucía non baixaba os brazos e conseguía recortar distancias por mediación de Elena. Antes do descanso, Vega, unha de lsa xogadoras máis destacadas do encontro, marcaba o 3-1, resultado co que ambos os conxuntos marchábanse a vestiarios.
A Selección Galega mandou tamén no segundo tempo
Na segunda metade a Selección Galega seguía levando o peso do partido e Aroa anotaba o 4-1, poñendo terra polo medio no marcador. A falta de dous minutos para a conclusión do choque e, tras unha boa xogada persoal de Aroa, Galicia volvía marcar facendo o definitivo 5-1.
Hai canteira no fútbol sala galego con esta xeración de futbolistas que vén pisando forte.
