O País Vasco acolle, do 20 ao 21 de decembro, o Campionato de España de Seleccións Autonómicas de Fútbol. Alí estarán os combinados galegos de categoría Sub15, dirixidas por Susú Cores, e Sub17, que adestra Quin Valbuena. Cheas de ilusión van As Nosas a Bilbao onde terán como primeiro rival a Cataluña. Todos os enfrontamentos terán lugar en Lezama, a Cidade Deportiva do Athletic Club, un esceario emblemático do balompé español.
Hoxe xoves marchan as galegas cara a Euskadi. Nesta semana levaron a cabo un adestramento en Valga e terán outro esta tarde.
Os rivais de Galicia para esta primeira fase serán as seleccións de Cataluña e Aragón. As Nosas debutarán o venres día 20. A formación Sub 15 que dirixe Susú Cores xogará o seu primeiro encontro ás 10 horas ante Cataluña, mentres que a Sub 17 que prepara Quin Valbuena estrearase ás 12.15 tamén ante Cataluña.
Xogar en Lezama é toda unha experiencia. Así o destaca Susú Cores, seleccionadora galega Sub17 que estará acompañada no corpo técnico por Vicky Vázquez e Alba Meilán. “Non hai mellor escenario que Lezama. O ano pasado foi en Galicia e estivemos moi arroupadas, pero Lezama é un histórico do fútbol feminino. O ambiente vai ser moi bo e será unha experiencia inesquecible”, explica.
A preparadora das Nosas Sub 15 viaxa a Bilbao coa ilusión por bandeira. “Temos moita ilusión por este Campionato. Sabemos que temos uns rivais complicados enfronte, pero imos coa mentalidade de gañar todos os partidos”. “Sabemos que Cataluña é unha potencia e sempre está nas fases finais. Van tentar dominar con balón e teñen xogadoras que marcan a diferenza, pero imos tentar facer o noso xogo. Aragón en teoría é algo máis alcanzable, pero isto é un Campionato de España e os dous rivais van ser complicados”, advertiu a seleccionadora.
Quin Valbuena, adestrador da Sub17 teno claro: unha derrota pode deixarche sen a segunda fase. “Polo formato de competición se perdes é moi difícil ou imposible. Aquí todo pasa por gañar ou empatar. Márcache moito o primeiro partido. Eu agora só penso en Cataluña“. Valbuena, que contará como axudante con Alejandro Villamarín, define ao equipo catalán como “un rival temible porque ten xogadoras internacionais, con moita calidade individual. Suponse que teñen moito ritmo e gústalles ter a pelota. A última vez que nos enfrontamos perdemos 1-0 fai catro anos e nós tiñamos unha xeración moi boa. De todos os xeitos, o fútbol foise igualando”.
En canto as aspiracións das nosas, Valbuena afirma que “imos coa nosa idea, crendo nas nosas posibilidades e iso pasa por presionar, arriscar, estar preto delas. Imos asumir riscos con todo o que iso conleva”.
PARTIDOS
SÁBADO 20
- 10:00 horas País Vasco – Aragón Sub 15
- 12:15 horas País Vasco – Aragón Sub 17
- 10:00 horas Galicia Sub 15 – Cataluña Sub 15
- 12:15 horas Galicia Sub 17– Cataluña Sub 17
SÁBADO 20
- 10:00 horas Cataluña – País Vasco Sub 15
- 12:15 horas Cataluña – País Vasco Sub 17
- 10:00 horas Aragón – Galicia Sub 15
- 12.15 horas Aragón – Galicia Sub 17
Tanto a Sub 15 como a Sub 17 afrontan a cita coa máxima ilusión e co obxectivo de regresar a casa cos 6 puntos. Con todo, tanto Susú Cores como Quin Valbuena son conscientes de que a empresa non será fácil nin moitísimo menos, aínda que confían no potencial das nosas para regresar a Galicia cunha boa colleita.
Convocatoria da Selección Galega Sub 15 Feminina
Convocatoria da Selección Galega Sub 17 Feminina
Convocatoria Campionato de España Seleccións Autonómicas Galicia Sub-17 / FUTGAL
