- Eva Castro estreouse oficialmente como adestradora da Selección Galega este domingo con dous segundos postos, obtidos pola ciclista elite Alba Arias e o rider Sub-23 David Fernández, na localidade abulense de La Adrada.
O ensaio xeral da Selección Galega de Enduro de cara ao Campionato de España do vindeiro mes de abril “deixou bos resultados e sensacións”, tal e como apuntan desde a Federación Ciclismo Galego.
Ademais deses dous segundos lugares, obtidos por Alba Arias e David Fernández, o balance autonómico galego nesta segunda cita da Copa de España 2023 completouse con outros cinco podios de corredores que defenderon as cores dos seus clubs, entre eles a segunda praza de Marco Veiga (Ciclos Quintena), novo líder da xeral elite.
O evento, organizado polo Bike Madrid, ofreceu un percorrido de 33 quilómetros e 1.650 metros de desnivel positivo acumulado no que se disputaron catro treitos cronometrados. A Selección Galega acudiu ata a provincia de Ávila con nove riders para preparar o Campionato de España do 22 de abril en Puntallana (Tenerife). O grupo dirixido por Eva Castro e o seu axudante Luis Manovel conviviu durante tres días nos que o obxectivo principal era a formación das promesas galegas do Enduro e a experiencia rematou pisando o caixón por partida dobre.
Alba Arias, aínda lesionada, remata segunda
Malia sufrir no terceiro treito unha caída que lle provocou unha lesión na man, Alba Arias conseguiu defender ata o final o segundo posto na clasificación elite e acadou a terceira praza na táboa absoluta feminina.
A corredora de Arteixo, cun tempo total de 20 minutos e 46 segundos, só foi superada na súa categoría pola gran favorita, a vixente campioa estatal Sara Yusto (Lácteas Cobreros), que se impuxo cun rexistro de 18’45”.
Máis preto da vitoria estivo David Fernández, a menos dun segundo e medio, despois dunha actuación moi estratéxica por parte do Sub-23 tudense. Moi concentrado de principio a fin, soubo manexar as referencias que lle chegaban dos seus principais rivais ata xogarse o triunfo nun man a man con David Bosch (Fornells de la Selva). O catalán venceu cunha marca de 14:47.427 e o galego fixo 14:48.688, o que lle serviu para ocupar a décima posición na táboa scratch masculina.
Ás portas do top-10 no grupo de idade Sub-23 quedaron catro riders da nosa comunidade: o undécimo posto correspondeu a Ismael Romero (Pontebike), o duodécimo a Manuel Loureiro (Selección de Galicia), o décimo cuarto a Marcos Estévez (Selección de Galicia) e o décimo sexto a Xoán Fernández (DH Galicia).
A parte alta da clasificación júnior masculina tamén contou cunha numerosa presenza galega. Raúl Romero (A Forna) logrou a terceira posición e entre os dez primeiros concluíron Hugo Rosendo (Selección de Galicia) na quinta praza, Uxío Atrio (Selección de Galicia) na sétima, Héctor Quinteiro (Selección de Galicia) na novena e Rubén Almeida (A Forna) na décima.
Pola súa banda, André Martínez (Selección Galega) chegaba a La Adrada na segunda posición da xeral, pero nesta proba non o acompañou a sorte. Sufriu unha avaría no freo no segundo parcial e unha rotura da cadea no terceiro. Logo destes contratempos mecánicos só puido aspirar a rematar a competición e fíxoo no décimo quinto posto. A aposta polos novos valores realizada polo combinado da Federación Ciclismo Galego incluíu ao cadete Yerai Peláez, quinto nun grupo de idade no que Rubén Temprano (Komanche) finalizou noveno.
Máis éxitos galegos
Á marxe das categorías nas que competiu o conxunto autonómico, o Enduro galego sumou outros catro podios e regresou de terras abulenses encabezando dúas clasificacións xerais. O naronés Marco Veiga, segundo na táboa scratch e na elite a 18″ do andorrano Alex Iscla, asaltou o primeiro posto do ranking elite.
Do mesmo xeito, a camisola da Copa de España vaina vestir o 30 de abril no Endurrazo de Moaña o máster-30 porriñés Santos Lemos (Grupeta Pan de Zarko), que rubricou o seu segundo triunfo nesta edición do certame estatal.
Como líder máster-40 en La Adrada partía José Manuel López Vaqueiro (Cerdedo-Cotobade) e agora está igualado a puntos con Juan Ignacio García (Monpedal Castellón) no primeiro posto da xeral do seu grupo de idade. O valenciano apuntouse o triunfo por diante de tres galegos. Bateu por case 4″ a Pedro Dapena (CiclosQuintena), por 7″ a López Vaqueiro e por menos de 8″ a Eduardo Cundíns (3AG).
Á colleita de resultados galegos hai que engadir outras sete prazas de top-10: Mauro González (Salvaterra), sexto elite e sétimo absoluto; Francisco Vilaboa (Singletrack), sétimo elite e oitavo scratch; Hugo Fernández (THC), sétimo máster-40; Jose Ernesto Camesella (Monteboi), sexto nos máster-50; e Santiago Alonso (Monteboi), décimo nos máster-50.
A seguinte cita da Selección Galega, en Moaña
A Copa de España regresará no Endurrazo de Moaña, terceira das cinco xornadas puntuables, e na fin de semana anterior á cita moañesa será a quenda do Campionato de España en terras tinerfeñas. Alí estará a Selección Galega.
