As seleccións galegas de balonmán infantil, cadete e xuvenil, afrontan o CESA 2023 con ilusión

Despois de varios meses de preparación, chegou o momento da verdade para as seleccións galegas infantil, cadete e xuvenil femininas e masculinas. As nosas e os nosos comezan mañá o Campionato de España de Seleccións Territoriais 2023 (CESA), que se celebrará do 3 ao 8 de xaneiro na provincia de Alacante. O CESA regresa ás súas datas habituais despois do suspensión da edición do ano 2021 e do retraso da correspondente ao ano 2022.

A expedición galega, formada por preto de 140 persoas, chegou a Benidorm, sen novidades e con ganas de saltar á pista. Foi unha longa viaxe en tres autobuses e dúas furgonetas na que se desprazaron as seleccións, corpos técnicos, corpo médico, equipo de comunicación e membros da xunta directiva da Federación Galega de Balonmán, co seu presidente Bruno López ao fronte. A competición comezará mañá, martes 2 de xaneiro.

O presidente da FGBm, Bruno López, recibiu as seleccións galegas na súa chegada ao hotel. Bruno quíxolles transmitir unha mensaxe de coraxe, paixón e respecto. “Se estades aquí é porque sodes a élite da base do BM galego, estades list@s para isto”#SomosFamilia #ConSeloGalego pic.twitter.com/ODeWjXY9CC
— Federación Galega Balonmán (@fgabalonman) January 2, 2023

A Selección Galega infantil feminina forma parte do grupo B da Copa de España xunto a Cantabria e La Rioja. O combinado dirixido por Ana Alonso comeza a competición fronte a La Rioja nun partido fundamental para coller confianza, cara ao obxectivo de acadar o ascenso.

A seleccionadora Ana Alonso pensa que “a nosa selección chega nun bo momento. Levamos acumuladas moitas sesións de traballo dende o mes de abril. O modelo está asentado e a verdade é que estamos contentos co rendemento do grupo”.

A Copa de España está dividida en tres grupos de 3 equipos cada un. Ana Alonso recordou que “as predicións nesta categoría son difíciles, e podes gañar e perder con calquera. Así, a idea é ir partido a partido, co obxectivo de clasificarnos para a eliminatoria de ascenso a Campionato de España e poder xogar os cuartos de final do Campionato”.

O primeiro partido da Selección Galega infantil feminina xógase mañá, 2 de xaneiro de 2023, contra La Rioja ás 12:00 horas.

A Selección Galega infantil masculina, que defende o bronce acadado o pasado ano, forma parte do grupo A xunto a Catalunya, Navarra e Castilla La Mancha. Adrián Menduíña destacou que “é un grupo con seleccións complicadas como Catalunya e Navarra, das que non temos moitas referencias previas pero que son seleccións que nos años anteriores veñen facéndoo moi ben.

Con respecto á última Selección, que é Castilla La Mancha, Galicia ten a referencia de xogar con eles en verán xa, e probablemente foi o partido que máis nos costou ganar nese torneo. Polo tanto hai que ter respecto polos rivais, pero nós estamos moi contentos co traballo previo realizado pola nosa selección e imos dalo todo neste CESA”.

O primeiro partido da Selección Galega infantil masculina será mañá, 2 de xaneiro de 2023, contra Castilla La Mancha ás 18:00 horas.

NÓS TÉMOLO CLARO! #SOMOSGALICIA #SOMOS FAMILIA pic.twitter.com/mJnVfDtLTD
— Federación Galega Balonmán (@fgabalonman) January 2, 2023

O combinado galego cadete feminino parte da Copa de España co obxectivo de chegar ao Campionato e dar a sorpresa. Galicia está encadrada no grupo B da Copa de España xunto a Cantabria (tamén descendida o pasado ano) e Murcia. O seleccionador Adrián Pumar destacou que ambos rivais son duros e que na Copa non han posibilidade de erro: “O que ten a Copa é que cada partido é unha final e iso fai que todos os encontros sexan tensos”.

Sobre a Selección Galega afirmou Adrián Pumar que “a palabra que usaría para definila sería OHANA (familia), porque este ano construímos un grupo moi unido, moi familiar, no que cada unha mataría polas demais”. O debut da Selección Galega cadete feminina será mañá, 2 de xaneiro de 2023, contra Cantabria ás 12:00 horas.

A Selección Galega cadete masculina está encadrada no grupo A da Copa de España xunto a Canarias e Cantabria. O seleccionador, César Armán, destacou a dureza do grupo, xa que “nos tocaron dous dos cocos da Copa. Canarias conta con varios xogadores de moita calidade e se caracteriza por un xogo rápido e dinámico. Por outra banda, Cantabria ten un bo grupo, sen individualidades pero moi competitivo”. Así, o obxectivo é “impoñer o noso ritmo e demostrar do que somos capaces, xa que nos caracterizamos por ser competidores natos”.

A primeira pedra de toque da Selección Galega cadete masculina será mañá, 2 de xaneiro de 2023, contra Canarias ás 16:00 horas.

A selección galega xuvenil feminina forma parte do grupo A do Campionato de España, xunto a Euskadi, Catalunya e Navarra. O seleccionador Manu López falou do seu equipo sinalando que “somos un grupo que fai un balonmán divertido, que viaxa co obxectivo de pasalo ben e aspirando a todo no CESA”. Iso si, non houbo sorte no sorteo xa que lle tocou un grupo moi complexo: “Temos un grupo moi competitivo, sen un dominador claro, con todas as seleccións cun nivel alto”. O debut da Selección Galega xuvenil feminina será mañá, 2 de xaneiro, ante Navarra ás 12:00 horas.

O combinado xuvenil masculino forma parte do grupo B da Copa de España está formado por Galicia, Aragón, La Rioja e Asturias. O seleccionador, Fernando Vázquez, destacou que son grandes rivais: “Por unha banda, está a selección de Asturias, que estivo no torneo Deputación da Coruña, con baixas importantes, e puxo serios problemas á nosa selección, que só gañou por dous goles de diferenza. A selección de Aragón chega con moi boa prensa, despois de vencer a Valencia e Navarra”. E por último, “La Rioja, que ten menos nome, pero é un grupo moi competitivo, ao que haberá que xogarlles moi ben e con moita concentración”.

Na Selección Galega xuvenil masculina houbo tres baixas de última hora. O adestrador, Fernando Vázquez, destacou que “é un grupo sen grandes nomes, pero é un equipo no máis amplo sentido da palabra”. O bloque terá o seu primeiro choque ás 16:00 horas de mañá, 2 de xaneiro de 2023 contra La Rioja.