A Selección Galega alevín feminina de fútbol sala despídese do Campionato de España de futsal tras caer ante Cataluña e os benxamíns seguen con vida tras superar a Asturias, segundo informa a RFGF.
Unha vitoria e unha derrota. Ese é o balance das nosas seleccións na segunda xornada do Campionato de España de Fútbol sala que se está a celebrar en El Ejido (Almería).
O combinado galego alevín feminino que prepara Bea Seijas despediuse este martes do torneo tras caer ante Cataluña (6-0). Esta derrota, unida á da xornada de onte ante Andalucía, deixa sen opcións de clasificación para as semifinais ás nosas mozas.
Pola contra, o equipo benxamín que dirixe Nino segue con vida tras a súa vitoria apertada ante Asturias (5-4) nun choque de alta tensión e con emoción ata o final. Os nosos acabaron levándose o gato á auga para manterse con opcións de clasificación.
O billete para semis, a pesar de que as opcións son remotas dado o número de goles encaixados na primeira xornada ante Extremadura, depende do resultado do choque de mañá mércores entre Extremadura e Asturias.
Por último, a Selección Galega alevín masculina depende de si mesma para plantarse ás portas da gran final. O elenco dirixido por Gael Madarnas, tras a súa brillante estrea ante Murcia (6-3), enfróntase este mércores a partir das 12 horas a Aragón. O combinado aragonés caeu este mesmo martes ante Murcia (5-4).
Así, os nosos teñen moitas opcións de clasificarse para as semifinais que terán lugar o xoves pola mañá.
