Ao longo da fin de semana celebrouse o XXXIV Trofeo Internacional Villa de Gijón no que competiu a Selección Galega de natación e outros oito equipos da comunidade: o CN Galaico, CN Ponteareas, Fluvial de Lugo, CN Coruña, CN Arteixo, AD Fogar, RC Náutico de Vigo e Pabellón Ourense. Na clasificación por clubs, o equipo da Federación Galega de Natación (FEGAN), foi o cuarto clasificado.
A competición, incluida no Calendario da Liga Europea de Natación (LEN) e no III Grand Prix Open do Circuito Nacional de Trofeos, celebrouse durante dúas xornadas e en piscina de 50 metros.
O conxunto galego obtivo un total de 29.443 puntos, quedando algo descolgado do podio. O CN Santa Olaya sumou 32.150 puntos, o CD Gredos San Diego 35.107 e o Gipuzkoa foi campión con 39.787 puntos. Dentro das categorías femininas destacou a galega Sofía Carballo batendo a mellor marca galega de 15 anos nos 50 braza, cun tempo de 33.72.
Seguindo o listado por clubs do Trofeo Villa de Gijón, o CN Galaico foi o equipo mellor clasificado, quedando na undécima posición con 18.261 puntos. Antía García acadou un bronce para o seu equipo no 50 bolboreta, mentres que o equipo de remudas de 4×50 mixto quedou na sétima posición.
Na seguinte praza do Villa de Gijón quedou o CN Ponteareas, con 18.078 puntos. A nadadora Sofía Carballo, procedente deste equipo, competiu coa Selección Galega, acadando unha prata nos 100 braza, cunha marca de 1:14.06, e unha sétima posición nos 400 estilos. Pola súa parte, Iria Lemos, tamén co combinado galego, quedou undécima nos 200 libre. Ademais, Iria González foi sexta nos 200 bolboreta.
O Club Fluvial de Lugo foi decimosexto, con 11.927 puntos. Seguiuno o CN Coruña, na decimoitava posición, con 10.832 e o CN Arteixo na seguinte praza, con 10.232. Este equipo tivo en Alba Gómez á súa nadadora máis destacada, quen rematou sétima no Táboa Fina. Tamén participaron en dúas remudas mixtas, en 4×50 libre o sábado, e en 4×50 estilos o domingo, acadaron os postos 13 e 9.
Nas probas de 100 e 200 do Villa de Gijón había eliminatorias e finais, nas de 50, eliminatorias, semifinais e finais. O CNA tivo tres finalistas, Alba Gómez, que entrou na final de tódalas probas nas que participou, 50, 100, 200 libre, 50 bolboreta e 200 estilos. Miguel Gómez, finalista en 100 e 200 braza, e Antía Gómez, finalista en 50 e 100 costas.
A AD Fogar clasificouse na 21ª posición, con 7.721 puntos, tendo en Nana Suárez a súa única representante feminina, rebaixando os mellores rexistros do club dos 16 anos nas probas dos 100 costas e 200 libres.
Finalmente, no tramo final o Real Club Náutico de Vigo foi 27º con 3.504 puntos, e o CN Pabellón Ourense, penúltimo na 36ª praza con 1.693 puntos.
Podes consultar todos os resultados do Trofeo Internacional Villa de Gijón nesta ligazón.
