A Selección Galega absoluta competirá esta fin de semana no Campionato de España de Federacións Autonómicas, ante outras 23 seleccións que se citarán en L’Hospitalet de Llobregat. Este torneo é a competición máis importante a nivel estatal das que se disputan por Seleccións Autonómicas.
Seguindo un modelo de competición mixta, inaugurado na pasada tempada por mor da situación sanitaria, acuden á cita un total de vinte tres atletas galegos, once deles femininas.
Con ausencias importantes tales como as de Ana Peleteiro, Adrián Ben e Belén Toimil metidos de cheo na súa inminente preparación para os Xogos Olímpicos, estará un grupo moi equilibrado de atletas que misturan veteranía, xuventude e unha gran dose de motivación na procura de lograr o un bo resultado que aporte o maior número de puntos posibles ao casilleiro galego.
As atletas da Selección Galega
Dentro da representación feminina galega, destacan nomes como Adi Iglesias, do Lucus Caixa Rural Galega, quen se atopa seleccionada para tomar parte nos Xogos Paralímpicos e quen recentemente establecía un novo récord galego absoluto dos 100 m. con 11.83.
Tamén estarán presentes a venezolana Edymar Brea, do Ourense Atletismo, sobre os 3.000 m. e a xavelinista cubana Yulenmis Aguilar, do CA Sada, (esta ca mellor marca das participantes), reforzando á Selección. O equipo galego contará así mesmo coa presenza de Alba Cuns, do Playas Castellón, no concurso de triplo salto, Carmen Escaríz, do Ourense Atletismo, nos 5.000 marcha e a do relevo mixto 4×400.
Ademais, tamén competirán Raquel Meaños nos 800 metros, Lucía Ferrer, da SG Pontevedra, nos 100 metros valos e no 4×100, proba na que estará acompañada por Ainhoa Reparaz, do Val Miñor, e María Fernández, do Riazor Atletismo.
Pola súa parte, Bea Viteri, do Alcampo Scorpio, competirá en pértega, mentres que María Ezquerro, do CA Sada, o fará en lanzamento de disco.
O obxectivo da selección pasa por mellorar o sétimo lugar logrado o ano pasado en Ciudad Real, na que se competiría nunhas datas e unhas condicións moi extraordinarias.
