- A Selección Española, campioa do Mundo de fútbol, xogará en Galicia.
A Vermella traerá toda a emoción da UEFA Women´s Nations League ata Pontevedra e tamén a Málaga, con senllos partidos do Grupo D desta nova competición continental de seleccións.
No caso galego, o Estadio Municipal de Pasarón de Pontevedra, e no caso andaluz, a Rosaleda serán testemuñas dos partidos España – Italia e España – Suecia, respectivamente, que se disputarán os días 1 e 5 de decembro.
Pontevedra acollerá, no seu estadio de Pasarón, o emocionante España – Italia do 1 de decembro. España lidera actualmente o grupo D tras vencer a domicilio a Suecia (2-3) e no Nuevo Arcángel de Córdoba a Suíza (5-0) na xanela de setembro.
A Selección Española en Galicia en partido oficial
Segundo explican desde a Real Federación Galega de Fútbol o feito de traer á Selección Española a Galicia era “dun reto de especial dificultade, xa que o combinado estatal está agora especialmente demandado e porque a RFEF ten un convenio asinado coa Junta de Andalucía para celebrar en estadios andaluces os partidos das seleccións absolutas. Malia todo, as negociacións levadas a cabo pola RFGF deron os seus froitos”, explican.
Así, o combinado estatal que dirixe Montse Tomé regresará cinco anos despois á nosa terra para disputar, nesta ocasión, un partido oficial correspondente á Nations League.
A última vez que a Selección Española Absoluta Feminina visitou Galicia foi no ano 2018 para disputar un encontro de clasificación para a Eurocopa do 2021. Entón, o rival fora Azerbaiyán no choque que se celebrou en Riazor.
A RFGF explicaba que “unha vez confirmado que a campioa do Mundo volve a Galicia, manterá unha serie de reunións coas diferentes administracións en próximas datas para trasladarlles a proposta e abrir diferentes vías de colaboración”.
Segunda ocasión para homenaxear a Tere Abelleira
Os pontevedreses e as pontevedresas xa puideron render a homenaxe merecida a unha das súas, Teresa Abelleira, poucas horas despois de alcanzar a gloria no Mundial coa Selección Española grazas ao evento que organizou, en primeiro lugar, a RFGF na súa sede na cidade do Lérez, e despois no acto organizado polo consistorio pontevedrés.
Con todo, este partido internacional de decembro en Pasarón sería outra cita histórica para o noso fútbol e para a propia Tere Abelleira, que tería así, no caso de formar parte da convocatoria, a oportunidade de recibir o agarimo dos seus.
Unha festa para o fútbol feminino galego
A Real Federación Galega de Fútbol plantexoulle á RFEF traer este partido a Galicia co obxectivo de dar as grazas a todos os clubs galegos que están a traballar polo desenvolvemento do fútbol feminino.
Segundo a Real Federación Galega de Fútbol os datos son espectaculares, coa creación de equipos e multiplicando as licenzas femininas por cinco nos últimos anos. E todo grazas aos clubs, ás adestradoras, ás xogadoras e, por suposto, tamén ás árbitras. “Por iso, este partido debe ser tamén unha gran festa do fútbol feminino galego”, din desde a RFGF.
Sabes cantas licencias femininas ten a RFGF? E cantos equipos?
Hai xa once anos a Selección Española masculina xogaba contra Arabia Saudí un partido amigable que servía para reinaugurar o novo Estadio Municipal de Pasarón, en Pontevedra.
Un estadio totalmente reformado que naquela ocasión recibira á Selección Española masculina que dous anos antes proclamárase campioa do Mundo en Sudáfrica co famoso gol de Andrés Iniesta.
Agora, once anos despois, é a Selección Española feminina a que locerá a súa estrella de campioa sobre o céspede pontevedrés.
