As Guerreiras Laranxas do Pescados Rubén Burela saltarán á cancha mañá sábado 20 de febreiro de 2021, con toda a intención de volver sumar de tres e reafirmarse no cumio da táboa. As da Mariña están segundas pero empatadas a puntos coa AD Alcorcón FSF que xa ten xogados tres partidos máis cas galegas. Esta é a súa segunda ocasión de facerse valer no máis alto da clasificación nunha mesma semana e na mesma cidade: Zaragoza.
Tras a vitoria desta semana ante o Bodegas Sommos Intersala (0-3), o Pescados Rubén Burela FS ten a segunda oportunidade da semana, e en terras aragonesas, para reafirmarse no cumio da clasificación do Subgrupo B da Primeira División do fútbol sala Feminino da RFEF. Sala Zaragoza, co Siglo XXI como escenario, esperará as Guerreiras Laranxas, ás 12.00 horas de mañá sábado.
O conxunto que preparar o adestrador Julio Delgado defenderá a primeira praza en solitario, con 28 puntos, e dous partidos menos que o seu rival máis próximo, AD Alcorcón. Pola súa parte, as alfareiras, con 25 puntos, recibirán o pechacancelas, Xaloc Alacant. Así que todo apunta a que as Guerreiras Laranxas non deberan deixar ir os tres puntos se non queren perder comba coa cabeza.
As mariñás terán que facer fronte á esixencia de dúas citas en menos de dous días, tras máis dun mes con tres aprazamentos: “Creo que o que nos gusta é competir. Despois dun mes case sen competir é duro pero tamén moi gratificante. Temos que recuperar ben e ir a por todas mañá para pechar ben a semana”, advertía a 21 das Guerreiras, Leti M. Cortés. A futbolista finalmente non puido participar na xornada 11 de La Granja, por molestias nun xemelgo, pero si agarda entrar na rotación mañá ante o Sala Zaragoza.
A valisoletana Leti M. Cortés, consultada polas ás lesións de longa duración dos últimos meses e dando ánimos na súa recuperación a Jenny, Cilene e Cely, apuntaba: “foi complicado, sen partidos e sen poder adestrar ao cento por cento; pero esta semana xa foi diferente. O equipo está ben; estamos a conseguir de novo o ritmo necesario”.
O Pescados Rubén Burela buscará o décimo trunfo desta primeira fase fronte ao quinto da táboa (18 puntos), que tras encadear dúas vitorias ante Majadahonda (2-4) e Xaloc (7-1) chega á xornada 15 coa derrota fronte ao potencial do Melilla (5-1).
“Con Sala Zaragoza conseguimos un marcador moi avultado en Vista Alegre (8-3), pero esta vez sabemos que será diferente; é un bo equipo, con boas individualidades, e ten a fortaleza da casa”, advertía a ala-peche Leti M. Cortés.
A expedición do Burela está conformada polas seguintes Guerreiras:
- 1. Jozi
- 3. Dany
- 4. Sandra Buzón
- 7. Peque
- 8. Cami
- 10. Lara Balseiro
- 11. Jane
- 14. Bea Mateos
- 17. Ale de Paz
- 19. Elena Aragón
- 21. M. Cortés
