O Dépor ABANCA exercerá de anfitrión mañá sábado na Cidade Deportiva de Abegondo para co SC Braga. O conxunto luso medirá forzas coas galegas a partir das 17:30 horas no campo 3 das instalacións. As portuguesas militan na máxima categoría do fútbol feminino do seu país. O cruce é un amigable de pretempada que servirá a ambos os dous clubs para a posta a punto de cara á competición no curso 2023-24.
As Nosas deportivistas chegan a esta cita co bo sabor de boca da pasada edición do Trofeo Teresa Herrera feminino, saldado cun solvente triunfo (2-0) ante o Deportivo Alavés Gloriosas, un dos aspirantes ao ascenso á Liga F.
A adestradora deportivista, Irene Ferreras, conta coas baixas de Ainhoa Marín, en proceso de readaptación física; e de Ana de Teresa, lesionada.
Con eses condicionantes, as futbolistas convocadas para este amigable coa SC Braga son as seguintes: Yohana, Samara, Clara Rodríguez, Henar, Inés Altamira, Paula Gutiérrez, Eva Dios, Carlota, Millene, Lía, Lucía, Ayaka, Laurina, Raquel, Marta Charle, Sara Debén, Cris Martínez e Paula Monteagudo; ás que hai que sumar a canteirás Carmen Carballada, Elena Vázquez e Lucía Rivas, estas dúas as últimas internacionais.
Catro mundialistas na SC Braga
Pola súa banda, o SC Braga é un dos rivais habituais nos veráns do Dépor ABANCA e preséntase en Abegondo tamén en plena fase de rodaxe pero cas catro internacionais que disputaron o último Campionato do Mundo de Australia e Nueva Zelanda: Patricia Morais, Ana Rute, Dolores Silva e Carolina Mendes.
Finalizado este amigable, o cadro deportivista descansa o domingo 13 e volve aos adestramentos o luns 14 ás 10:00 en Abegondo.
