Despois da paréntese da fin de semana anterior coa disputa da cita da Copa de España en Outeiro de Rei, a Copa Galicia de Cross Country Olímpico iniciou este sábado o treito final do seu calendario nun dos seus circuítos máis emblemáticos. A oitava proba puntuable foi a de Maceda, onde a corredora local Sarela Conde outorgoulle a vitoria ao club organizador na carreira raíña feminina.
A sub-23 do Academia Postal-Maceda, Sarela Conde, dobregou nesta ocasión a Uxía Soto (Extol-Zambora.es), dominadora deste certame nas últimas xornadas. A súa xeira de triunfos si que a prolongou o elite Miguel Rodríguez (Supermercados Froiz) no prato forte das categorías masculinas.
O trazado de 4,5 quilómetros xunto ao río e coa liña de meta xunto a carón das piscinas municipais, un escenario que ten acollido ao Campionato de España de XCO, percorrérono preto de 200 bikers. Ente eles estivo un dos mellores corredores na historia de Galicia nesta especialidade. Pablo Rodríguez, esta temporada afastado da competición, animouse a poñerse un dorsal na súa vila para participar no XVII BTT de Maceda e a súa clase permitiulle subir ao podio. Defendendo as cores do Academia Postal-Maceda fixo terceiro en elite e sub-23, tal e como informa a Federación Ciclismo Galego.
Por diante do macedao remataron dous representantes do Supermercados Froiz. O ponteareán Miguel Rodríguez venceu por 20 segundos de diferenza respecto ao grovense Jorge Aguín, que continúa como líder elite. Esta vitoria é a terceira consecutiva do segundo clasificado na xeral, que neste mes de maio xa se impuxera en Ribadumia e en Ponteareas. Como mellor sub-23 concluíu Néstor Frías (Ribadumia), cuarto na táboa absoluto. A liña de meta cruzouna na quinta posición o elite Roberto Freire (Toxo).
Sarela Conde crécese como anfitrioa
Case un mes despois de subir ao máis alto do podio en Samieira, a macedá Sarela Conde sumou o seu segundo triunfo da temporada. A líder sub-23 Uxía Soto chegaba lanzada, pero non puido repetir os seus éxitos das dúas últimas xornadas ao atoparse cunha corredora que se creceu na súa casa exercendo de anfitroa: Sarela Conde. A vantaxe final roldou o minuto. Outras tres sub-23 completaron o top-5 feminino: Fátima González (Máis Que Bicis) obtivo a terceira praza, Yaiza Vila (Creto Bikes) terminou cuarta e Sandra Vila (Coruxo), cunha volta perdida, ocupou o quinto posto.
Entre os desenlaces máis vibrantes estiveron o da categoría júnior masculina, con Arón Gómez (Coruxo) batendo por 5 segundos a Samuel Gascón (Team Bike Outeiro de Rei), e o da infantil feminina, ao superar Aroa García (Cambre) a Uxía Giráldez (Avanza-O Porriño) ao esprint.
Na nómina de gañadoras e gañadores tamén inscribiron o seu nome o infantil Jorge Martín (Avanza-O Porriño), a cadete Marta Utrera (Xesteiras), o cadete Sergio Pérez (Avanza- O Porriño), a júnior Xiana Seijo (Caimanes Betanzos), a máster-30 Carolina Díez (Creto Bikes), o máster-30 Samuel Fernández (Maceda), a máster-40 Beatriz Vicente (Podium Team), o máster-40 Uxío Canosa (Extol-Zambora.es), o máster-50 Antonio Rodríguez (Ourense Termal) e o máster-60 Antonio Bugallo (Biciosos-Rías Baixas).
A clasificación por clubs encabezouna o Avanza-O Porriño.
En canto aos rankings da Copa Galicia, o único cambio de líder rexistrouse no grupo de idade máster-30. Samuel Fernández volve estar á fronte da súa categoría.
No resto mandan Aroa García e Jorge Martín en Infantil, Clara Pintos (B Travel-Ponteareas) e Sergio Pérez en Cadete, Nerea Sánchez (Xesteiras) e Manuel Souto (Xesteiras) en Júnior, Uxía Soto e Ricardo Buba (Coruxo) en Sub-23, Lorena Daporta (Armenteira e Punto) e Jorge Aguín en Elite, Carolina Díez en Máster-30, Beatriz Vicente e Samuel Baña (Toxo) en Máster-40, Antonio Rodríguez en Máster-50 e Manuel Bugallo en Máster-60.
O certame autonómico de rally continuará este sábado en Cambre co antepenúltimo evento da temporada.
