Milita na máxima categoría do balonmán español: a Liga Guerreras Iberdrola. Chámase Sarai Samartín xoga como primeira liña no Conservas Orbe BM Porriño e súmase ás mulleres que analizan para As Nosas, nesta reportaxe coral, o estado do deporte galego en materia de igualdade.
A.N.: Consideras que o papel da muller no deporte é igualitario?
Sarai Samartín: Bueno creo que igualitario aínda non, pero estase mellorando. É difícil falar de igualdade por que vese menos. Estamos mellorando na repercusión, pero aínda falta. Cada vez se da máis a coñecer e estamos mellorando. Pero para falar de igualdade total aínda quedan cousas por conseguir. O exemplo máis claro sería o fútbol.
A.N.: Ao respecto da anterior pregunta, responde Galicia ao patrón estatal ou observas diferencias? En caso de ver diferencias, a situación galega sería mellor ou peor que a estatal?
Sarai Samartín: Eu creo que estamos na mesma liña. Desde a Federación de Balonmán trabállase todo o territorio. Xogo nunha Liga dirixida pola Federación Española e se está mellorando moito. As federacións fan un gran traballo.
Na base creo que xa non se dan diferenzas a nivel federativo entre nenos e nenas. Trátase igual as seleccións e as ligas masculinas e femininas. Mesmos hoteis, mesma roupa, etc.
Sarai Samartín, xogadora do Convervas Orbe BM Porriño: “As federacións fan un gran traballo”
A.N.: En que momento da túa vida tropezaches por vez primeira cunha discriminación por xénero no deporte? Que pasou?
Sarai Samartín: As diferenzas nótanse nos soldos, ou na repercusión nacional das televisións que si pasan os partidos, non nun caso especial.
A.N.: Observas que por ser muller existen maiores dificultades para a práctica deportiva a niveis de competición?
Sarai Samartín: A dificultade ven no que podes chegar a cobrar sendo muller xogando ao nivel que xogamos nós. As miñas compañeiras estudan, traballan e xogan. Os homes adícanse ao balonmán, aínda que algúns poidan estudar.
Ao mesmo nivel de profesionalidade, obsérvanse diferentes condicións laborais, por exemplo, nos contratos. A esixencia está. Adestramos a diario e xogamos cada fin de semana.
A.N.: Na túa opinión, hai límites ou teitos de cristal para o acceso da muller a diferentes postos no mundo do deporte á marxe do papel de deportistas (adestradoras, directivas, preparadoras físicas, etc)?
Sarai Samartín: Non, a día de hoxe estase demostrando a onde se está chegando. Non hai límites. Cada día valórase máis. Entrar como corpo técnico dun equipo xa non hai límites, calquera pode chegar. Quizás si hai que demostrar un pouquiño máis.
Sarai Samartín: “Avanzamos e imos cada día a mellor”
A.N.: Con respecto a cando empezaches a túa vinculación co deporte, hai agora menos trabas? Houbo unha evolución positiva no tempo?
Sarai Samartín: Si. Cada ano hai algunha mellora. Nótase que avanzamos e que vai cada día mellor.
A nós televísanos un partido cada fin de semana, fanse reportaxes de toda a Liga, e os medios locais falan de nós. Tamén hai máis obrigacións por parte dos clubs para con as xogadoras. Pídeas a Federación Española que está a facer un gran traballo.
O camiño é ese para que todos os podamos competir igual. Iso repercute na competición. Estase notando por que a competición mellora cada ano.
A.N.: Cales consideras que son os principais atrancos que ten hoxe unha muller para desenvolver unha carreira deportiva?
Sarai Samartín: A día de hoxe os atrancos son de cada un. Non tes problema por ser muller ou home. Pódeste formar en clubs. Non creo que sexa problema. Eu comecei nun club de fútbol masculino eu xogaba ao fútbol e a día de hoxe vense un montón de nenas. Eu tiven que deixalo chegada a unha categoría.
A.N.: Pódese vivir do deporte sendo muller?
Sarai Samartín: Si, pero tes que chegar moi alto e incluso ir a outros países e depende do deporte, do club no que esteas… En balonmán poderíase, pero un pouco xusto.
A.N.: Como limita a progresión ter que compaxinar a práctica deportiva con outro tipo de actividades profesionais?
Sarai Samartín: Quítache horas de adestramento. No caso do balonmán se se quere facer unha sesión dobre, non todo o mundo pode. Non é o mesmo que esteas pensando so no deporte que esteas pensando nun exame ou noutras cousas. Se tes más cousas nas que pensar, repercute na concentración.
A.N.: Que mudarías do deporte actual para camiñar cara a unha igualdade plena?
Sarai Samartín: Os pasos que se están seguindo son os correctos. Melloras nos contratos e soldos, medios, maior repercusión canto máis se coñeza o deporte feminino, maior será a participación das empresas. Máis doado será que colaboren. Canto máis visible sexa o balonmán ás empresas máis lles interesará colaborar con nós.
Sarai Samartín, xogadora do Convervas Orbe BM Porriño: “Os pasos que se están seguindo son os correctos. Melloras nos contratos e soldos, medios, maior repercusión…”
A.N.: Hai quen avoga polo deporte mixto máis aló da base como unha posibilidade? Es partidaria?
Sarai Samartín: Uf… Creo que non. Hai deportes no que o físico entre a muller e o home os fai distintos. En balonmán é o mesmo deporte pero ves un partido masculino e outro feminino e nós xogamos a outra cousa. O masculino é máis físico. Creo que en balonmán non avogaría polo deporte mixto. Eles teñen outro físico que non podería ser mixto. Na base si. Aí está moi ben.
A.N.: Cres que o deporte feminino está a vivir un momento doce?
Sarai Samartín: Si, creo que si. A prata que gañou a selección feminina de balonmán e todos os títulos que están colleitando en ámbito internacional as deportistas, repercuten en todas as mulleres que practicamos deporte. Dannos máis a coñecer. Mesmo a selección española de fútbol este verán tivo visibilidade.
A.N.: Ao fío desta última pregunta valora de 0-10 (sendo 10 o mellor) o momento actual do deporte feminino nestes ámbitos:
Sarai Samartín:
- Resultados deportivos ______________________ 8
- Visibilidade en xeral na sociedade __________ 7 (vai por deporte)
- Repercusión mediática ______________________ 6
- Apoio de seareiros/as _______________________ 7
- Patrocinios __________________________________ 6
- Apoio das diferentes administracións _______ 6
