- Sara Folgueira disputou catro tempadas na primeira etapa no seu club de formación nas que logrou un ascenso a Superliga e unha Copa Princesa, da que foi nomeada MVP.
- “Cando estabamos a pechar o equipo decatámonos da posibilidade de que Sara volvese e non o dubidamos un segundo. A súa chegada dálle un salto de calidade aínda maior ao persoal e a ilusión coa que vén fainos confiar en que imos lograr sacar o máximo rendemento posible”, recoñece Manuel Blanco.
O CV Arenal Emevé descolga unha das fotos da lona de honra do Municipal para convertela no broche de ouro ao seu equipo de cara á tempada 2022-23. Sete tempadas despois, Sara Folgueira regresa a casa.
A oposta lucense, que protagonizou un dos debuts máis precoces na historia do club, cando tiña só 15 anos, volve a beira do Miño despois de pisar algunhas das pistas máis emblemáticas do continente. No transcurso do tempo desde que se foi, ata o de agora que está de volta, tivo a oportunidade de enrolarse no Charleroi belga da man de Pascual Saurín, regresar a España para pelexar polos grandes títulos nacionais co CV JAV Olímpico e saboreou os meles do éxito en Avarca Menorca onde gañou unha Supercopa.
Na xénese de todo catro tempadas no club que a viu nacer, cun ascenso a Superliga e o triunfo en Copa da Princesa de 2014, celebrada en Miranda de Ebro, na que unha novísima Sara Folgueira foi designada como MVP da competición.
Mentres tanto, chamadas das inferiores da Selección Española primeiro e a disputa de dúas Golden League coas maiores despois. Neste suspiro de algo máis dun lustro e algo menos dunha década Sara Folgueira ata puido subir ao teito do Municipal nesa lona de honra na que lle acompañan Pepo Garrido e Majo Corral.
Agora a icona volve materializarse sobre a pista nunha agradable sorpresa, como recoñece o adestrador do CV Arenal Emevé, Manuel Blanco: “Cando estabamos a pechar o equipo decatámonos da posibilidade de que Sara volvese e non o dubidamos un segundo. A súa chegada dálle un salto de calidade aínda maior ao persoal e a ilusión coa que vén fainos confiar en que imos lograr sacar o máximo rendemento posible”, recoñece o técnico venezolano.
Así queda o CV Arenal Emevé coa chegada de Sara Folgueira
Coa guinda do pastel que supón a chegada de Sara Folgueira, as Loitadoras pechan o seu persoal coa seguinte configuración:
- Receptoras: Lucía Prol, Carolina Camino, Alejandra Pérez e Julia Paradela.
- Opostos: Jimena Fernández Gayoso e Sara Folgueira.
- Colocadoras: Valentina Galiano e Ainara Burgo
- Centrais: Mame Diouf, Marcella Amaral, Candela López e Uxía García
- Líberos: Eliana González e Lida Figueira