Santiago Ferrer Moreira é adestrador nacional de atletismo e colaborador do sector de lanzamentos da RFEA. Na súa época como atleta chegou a formar parte da selección nacional de atletismo. A día de hoxe, é un dos adestradores máis carismáticos e recoñecidos na Sociedad Gimnástica de Pontevedra pola súa gran traxectoria e polas súas máis de 45 anos vinculado á entidade pontevedresa.
O confinamento por culpa do coronavirus afectou ao desenvolvemento da tempada atlética e, por tanto, aos adestramentos dos atletas do club. Santiago Ferrer fala sobre o seu punto de vista como adestrador de moitas das promesas galegas ante esta complicada situación.
Pregunta: O primeiro, como afecta a corentena ás atletas?
Resposta: Desde o meu punto de vista supón unha rotura de ritmo en xeral que podemos equiparala a unha lesión común para todos de longa duración. Con todo o que supón para un atleta (perda de tempada) e, a partir de aí, é o atleta e as súas circunstancias.
P: Como adestrador, mandácheslles exercicios aos teus atletas?
R: Si, e se non minten, sorpréndeme favorablemente que a maioría o estén a facer.
P: Especialmente que exercicios mandácheslles?
R: En principio traballo xeneral para todos, xa que esta pandemia xorde nun ciclo que chamamos segunda pretemporada e, por agora, aínda descoñecemos a súa duración.
Santiago Ferrer, adestrador da Sociedad Gimnástica de Pontevedra: “Este parón é como unha rotura de ritmo en xeral que podemos equiparala a unha lesión común para todos de longa duración”.
P: Pódese adestrar en condicións desde casa?
R: Pódense facer cousas, dependendo da dispoñibilidade e ganas de cada un, pero nunca son as condicións ideais.
P: Ademais de tentar manterse en forma, tamén sería necesaria unha alimentación máis estrita agora que estamos máis encerrados?
R: A alimentación sempre deben tela en conta, e máis agora. Non só en calidade, senón que tamén en cantidade, xa que se supón que o consumo diario é menor debido ao confinamento.
P: Que sector atlético cre que é o que vai saír máis afectado do confinamento?
R: Creo que todos ven afectados en igualdade. Ao corredor fáltalle correr en distancias e os de forza explosiva (concursos) notan a falta do ximnasio. A pesar de que todos necesitan adestrar de todo en maior ou menor medida.
P: Canceláronse todas as probas deportivas ata novo aviso, no caso de que se retome a tempada este ano, as atletas deberían ter un período de pretemporada?
R: Na miña opinión, a tempada como era regularmente está perdida. Agora ben, na situación de que se renove, haberá que tratar cada caso individualmente, pois inflúen idades, disciplinas, o que se fixo ata o de agora, etc.
Santiago Ferrer, adestrador da Sociedad Gimnástica de Pontevedra: “Na miña opinión, a tempada como era regularmente está perdida”.
P: Se se retomase, crees que as federacións de atletismo deberían baixar as marcas mínimas, xa que as atletas estarían en peor estado de forma ao non poder adestrar en condicións?
R: En categorías de menores non ten por que e as maiores é máis complexo pois son influentes os niveis (local, autonómico, nacional e internacional), pero si se debe articular algunha forma para que non prexudique aos deportistas.
P: É partidario de manter a tempada ou de comezar unha nova?
R: Para dar continuidade a esta tempada tería que solucionarse en breve o confinamento, pero coa información que dispoñemos non o vexo a curto prazo, polo que probablemente teremos que ir pensando nunha nova.
Santiago Ferrer, adestrador da Sociedad Gimnástica de Pontevedra: “Probablemente teremos que ir pensando nunha nova tempada”.
P: Xa se coñeceu a nova data dos JJOO de Tokio 2020, que lle parece que o pospuxeran ao ano que vén?
R: Lóxico, o ben ou o mal é para todos e debemos concienciarnos de que o está ocorrendo é moi serio.
P: Para finalizar, que mensaxe daríasllea as atletas do club?
R: Que pensen en afrontar o presente para gozar do futuro. Como dixen ao principio é como recuperarse ben dunha lesión de longa duración, que é a mesma para todos. Paciencia!
