Un ano máis, e xa van cinco, Santiago de Compostela quixo rendir homenaxe ás súas deportistas a través da V Gala do Deporte. Nesta ceremonia, celebrada no Auditorio de Galicia, entregáronse 12 premios en distintas categorías, catro delas directamente relacionadas co deporte feminino.
Na categoría base, a gañadora foi a atleta Ainoa Gontán, mentres que na absoluta, o recoñecemento foi para a judoka Estrella López. No apartado da arbitraxe, Iris Díaz, colexiada da Liga EBA, foi a gañadora.
Por outra banda, o premio ao adestrador máis destacado foi para o técnico do Ulla Oil Rosalía, Chiqui Barros, que foi quen de asinar a permanencia na Liga Feminina 2.
O resto de premiados
No que respecta ás entidades, foron premiadas a Sociedade Deportiva Compostela, a USC, o ADB Fontiñas, Jerubex Ibérica, o Obradoiro e o deporte de Santiago en xeral, polo traballo neste ano excepcional.
En categorías masculinas, foron galardoados Ismael Navaza, Roberto Vieiro, Jonathan Barral e Roberto Peñamaría.
A elección das candidaturas
Segundo explica nunha nota o Concello, para o outorgamento destes premios constituíuse un comité avaliador, presidido polo alcalde da cidade e integrado pola concelleira de Deportes; por un membro de cada un dos grupos políticos con representación municipal; un representante da Secretaría Xeral para o Deporte da Xunta de Galicia; un representante da Deputación de A Coruña; un da Universidade de Santiago de Compostela e un representante de cada un dos medios de comunicación con sede local en Santiago.
Á gala acudiu o alcalde de Santiago, Xosé Sánchez Bugallo, presidindo o acto, no que tamén estivo a concelleira de Deportes, Esther Pedrosa, e os membros do comité avaliador. A celebración retransmitiuse a través do Youtube do Concello.
