A pugna do HC Borbolla de Santi Martínez por acadar a permanencia na Ok Liga non fixo máis que empezar, aínda que fose con bo pé. Cada semana agarda ás tomatitas unha partido que vivirán como unha final. O de hoxe sábado, 20 de febreiro, as leva a terras catalás para medirse a partir das 20:00 horas coas líderes do grupo que loita por quedar na elite, o CP Esneca Vila-Sana. Arbitrarán o encontro os colexiados Alan Navarro Mir e Josep León Ruiz (auxiliar).
Santi Martínez, adestrador das galegas, confirma que non ten baixas para este cruce, aínda que “Edén estivo toda a semana con molestias nunha perna. Pero ao final, entrou na convocatoria”, di o técnico coruñés. A cancerbeira local fixo unha grande actuación na portaría pese a estar parte do partido sufrindo xa estas molestias que lle deron a lata tamén durante o traballo semanal.
Edén Avecilla é unha porteira moi nova que pasou previamente pola canteira do HC Liceo e que agora viste a elástica das de Monte Alto. Pese a non ser a titular baixo paus, todas as veces que lle tocou defender a portaría do HC Borbolla conseguiu asinar unha boa actuación e confirmar que é unha clara opción de futuro para o cuadro herculino.
Aínda así, a calidade e a experiencia de Fernanda Tapias, farán que, previsiblemente, a chilena regrese a esa demarcación neste cruce coas primeiras clasificadas.
Na primeira fase da competición o CP Esneca Vila-Sana non foi un equipo doado de batir. Encaixaron poucos goles. En total, so 28. Polo que, a priori, será complicado para as coruñesas perforar a meta rival. Así o confirmaba Santi Martínez, que detallaba que, na súa opinión, “sí, vai ser difícil que encaixen un gol. É un equipo moi ordenado, cunha gran defensa e ao mesmo tempo con moito gol. Pero a estas alturas da competición, temos que intentar puntuar en todas as pistas”, advertía o míster das coruñesas.
Líderes e intratables
O CP Esneca Vila-Sana ocupa a praza de líder con 21 puntos. Arrastrou da fase primeira da competición un pleno de seis trunfos outros tantos partidos e logo de gañar tamén o seu primeiro cruce desta fase (1-4) ao CP Alcorcón, atesora un golaverage global a favor de 42 tantos e suma xa sete vitorias.
No caso do HC Borbolla, a vitoria da pasada semana diante do Igualada Feminí HCP supuxo un auténtico paso adiante para tomatitas. Subiron na clasificación até a quinta praza. Suma agora nove puntos froito de tres trunfos e conta con tantos goles a favor como en contra (18). Neste momento da Ok Liga, o equipo coruñés está a un punto dos postos que outorgan a salvación, pero toda a táboa está moi igualada, a excepción, precisamente do seu contrincante desta semana, o CP Esneca Vila-Sana que parece o único ao que todo selle tería que dar moi mal para que non conseguise manter a categoría un ano máis.
Santi Martínez: “Temos que facer un partido moi completo para puntuar”
O adestrador do HC Borbolla sabe que as súas pupilas visitan unha cancha das máis difíciles e avisa: “O Vila – Sana é un equipo moi forte. Este ano todo o mundo contaba con elas para loitar polos postos de arriba”, lembra o técnico.
Con todo, Santi Martínez confía nas posibilidades do Borbolla e plantea que aínda sabendo da complicación do rival “coido que temos as nosas opcións para acadar algo positivo se somos quen de marcar o ritmo do partido e estamos moi concentradas desde o inicio”, puntualiza.
Santi Martínez, técnico do HC Borbolla: “Este ano todo o mundo contaba co Vila-Sana para loitar polos postos de arriba”
Na opinión do entrenador do HC Borbolla: “Sabemos que debemos realizar un partido moi completo para poder puntuar, pero confío plenamente en que poderemos facelo aínda sabendo que será un partido complicadísimo”, matiza o preparador coruñés.
Xa o avisaba tras o partido co Igualdada: “Todos os partidos serán autenticas finais para seguir na loita e ter a posibilidade de lograr a ansiada permanencia na OK Liga Feminina”.
