O HC Borbolla coruñés, que adestra Santi Martínez, iniciou esta fin de semana, logo de varias de parón, o seu concurso na segunda fase da competición. Fixoo contra o Igualada Feminí e gañou con rotundidade (4-1) no seu feudo de Monte Alto, na Coruña.
Nesta etapa competitiva as coruñesas xóganse seguir ou non entre a elite do hoquei sobre patíns español. So os tres equipos que queden primeiros neste grupo pola permanencia acadan o premio de seguir na Ok Liga Feminina o vindeiro ano.
De momento, as galegas foron quen se auparse á quinta praza e está a un so punto de eses postos de podio que outorgan o salvoconduto para seguir entre as mellores no vindeiro curso. O adestrador do HC Borbolla, Santi Martínez, segue avisando que todos os partidos desta fase “serán autenticas finais”.
As Nosas: Foi tan doado o partido como reflicto o marcador? Como o vivichedes desde o banco?
Santi Martínez: Saímos concentradas desde o asubío inicial e tivemos a sorte de marcar moi pronto o que nos permitiu xogar con máis tranquilidade. O primeiro tempo estivo bastante igualado, aínda que con lixeiro dominio pola nosa banda, con saídas á contra do Igualada buscando gañar as costas á nosa defensa e nós con ataques mais longos e combinando en busca de ocos ou o fallo defensivo das catalás.
Na segunda parte o partido seguía pola mesma senda ca primeira, pero todo cambiou, sobre todo a partir do minuto 5, cando logramos un novo gol o que provocou un cambio na dinámica do xogo. O Igualada presionou máis, proseguiu coas contras e ataques rápidos, e buscou con máis afán o chute exterior para que desviase algunha xogadora na área.
Pola nosa banda nós buscamos un maior control de bóla, ataques longos e aproveitar as présas do conxunto rival para montar rápidas contras e aproveitar os espazos que nos deixaban coa súa presión e así gañarlles as costas.
Creo que dentro da igualdade do partido, soubemos impor o noso xogo. Ao meu modo de entender, foi unha demostración, un día máis, do que creceron a mozas, tanto individualmente como en equipo.
Santi Martínez, adestrador do HC Borbolla: “As xogadoras nótaselles ese puntiño máis de madurez que lles fixo volver controlar o partido.
Loxicamente houbo fases nas que estivemos un pouco apresuradas e perdemos algo o control do xogo, pero é de entender xa que nos estabamos xogando seguir vivas na competición, pero tamén se lles nota ese puntiño máis de madurez que lles fixo volver controlar o partido.
As Nosas: Onde consideras que estiveron vos puntos de inflexión ou chaves deste partido co Igualada Feminí?
Santi Martínez: Un sería o feito de ter marcado axiña, ao comezo de cada período. Iso deunos maior tranquilidade para tentar impor o noso xogo e meteulles présa e presión ao Igualada Feminí.
Outro punto chave foi nosa defensa, con constantes axudas e a grandísima actuación de Edén Avecilla na portaría que desbaratou moitas ocasións do conxunto catalán.
Por outro lado, marcamos o tempo do partido en moitas fases e elas non estiveron cómodas no partido
Santi Martínez, adestrador do HC Borbolla: “Un dos punto chave do partido foi nosa defensa, con constantes axudas e a grandísima actuación de Edén Avecilla na portaría que desbaratou moitas ocasións do conxunto catalán”
As Nosas: Este resultado colócavos a un punto dá salvación. Pero todo segue nun pano…
Santi Martínez: Pois si, a verdade é que sabiamos que lograr a vitoria era moi importante para os dous equipos, e para nós era fundamental para engancharnos na loita por evitar o descenso, xa que se perdiamos, a situación complicaríasenos moitísimo.
A clasificación, tras os resultados desta xornada, igualouse moito máis, o que demostra que todos os partidos serán autenticas finais para seguir na loita e ter a posibilidade de lograr a ansiada permanencia na OK Liga Feminina.
