No ano 2020 o hoquei sobre patíns galego volveu ter un equipo representándoo na elite desta disciplina no ámbito estatal. A honra correspondeu ao HC Borbolla. Neste repaso ao acontecido no deporte galego neste ano de vida de As Nosas, falamos co adestrador das tomatitas, o coruñés Santi Martínez.
O balance de 2020 “é positivo, culminamos o obxectivo de ascender”
“Pois sen dúbida o balance ten que ser positivo, non pode ser doutra maneira, xa que logramos culminar o obxectivo que nos propuxemos ao principio da tempada que non era outro que o ascenso á OK Liga“, di o adestrador das herculinas cando lle preguntamos polo balance que fai do ano 2020.
Para o técnico galego Santi Martínez “este ascenso é a culminación a un proxecto do club nado tres anos antes cun grupo de xogadoras moi mozas deportivamente no noso club e que a base de moitísimo traballo e esforzo tanto por parte das xogadoras como do club se puido lograr, e nos dá a opción de comezar cun novo proxecto que é o seguinte paso polo que estamos xa traballando q é lograr a permanencia e traballar para lograr ser un equipo habitual na categoría”.
O mellor de 2020, “ascender á Ok Liga” e o peor, “a cancelación da competición”
Nas cousas positivas do ano volve saír na conversa con Santi Martínez o acceso á elite do hoquei sobre patíns estatal. “O mellor, sen dúbida, o ascenso logrado, e ver como o equipo coa base do persoal nado no club, mais uns cuantos reforzos, está a competir na considerada mellor liga do mundo culminando esta primeira fase do ambicioso proxecto nacido uns anos atrás”.
E no malo, os efectos colaterais que a COVID-19 tivo nas competicións deportivas, volve agromar: “O peor do ano non pode ser outro que as competicións se tivesen que cancelar debido á pandemia que nos azouta o que provocou que non lograramos o ascenso da maneira que nos gustaría. Esta paralización das competicións trastornou os nosos plans xa que buscabamos conxuntar e rodar o equipo ante un posible ascenso, e así telo mais preparado para competir desde o inicio na Ok Liga“.
Que lle pide o equipo ao 2021?: “A permanencia”
A lista de desexos de Santi Martínez para este ano 2021 é clara: “O primeiro, como non pode ser doutra maneira, pedimos que se logre vencer, ou polo menos controlar. esta pandemia. Outra petición é q póidanse desenvolver con absoluta normalidade todas as competicións”, di o adestrador do HC Borbolla.
E pensando máis nos restos propios, Santi Martínez apunta que para o equipo que prepara “pedimos ao ano novo lograr a permanencia de maneira que nos permita dar un paso máis no noso proxecto e loitar polo seguinte obxectivo que non é outro que ser un equipo habitual da Ok Liga feminina“.
