O HC Borbolla, que adestra Santi Martínez, estivo a piques de puntuar na correosa pista do CP Esneca Vila-Sana onde finalmente caía por 3-2 logo de remontar ata o empate un 2-0 ás catalás. Non era doado. As locais son as líderes deste grupo de clubs que loitan pola permanencia e as únicas que parecen ter case todo ao seu favor para conseguilo. Tras o partido o técnico das coruñesas, Santi Martínez, salientaba o crecemento do grupo que adestra e a súa capacidade de competir.
As Nosas: Acariñouse a xesta…
Santi Martínez: Si, a verdade que estivemos moi preto de lograr algo positivo, mesmo nos últimos minutos do partido tivemos dúas ou tres ocasións claras de empatar, nas cales, a falta de acerto ou a gran actuación da porteira local, evitaron que obtivésemos algún punto ante o líder destacado do grupo.
As Nosas: Remontar até o empate fóra de casa e ante un rival como o Vila-Sa, fala moito e ben do arroxo e a calidade deste bloque, confírmase por tanto o crecemento e maduración do grupo.
Santi Martínez: Este partido demostrou, unha vez máis, que este grupo de xogadoras creceu moitísimo desde o inicio da competición. E aínda que isto é algo que digo habitualmente, é que partido a partido están a demostralo. Mostra diso é que, a pesar de que onte non foi o noso mellor partido, é máis, diría que non xogamos demasiado ben, fomos capaces de competir fronte a fronte contra un gran equipo, feito para loitar polos postos de arriba e que posúe un grupo de moi boas xogadoras.
A base de traballo en equipo, en ningún momento perdemos a cara ao partido e fomos capaces de igualar o 2-0 co que se adiantou Vila-Sana. Un polémico gol a falta de 20 segundos para o descanso foi o que desequilibrou o marcador, xa que en toda a segunda parte, ningún dos dous equipos logramos bater á porteira rival.
As Nosas: Que análise fas do partido?
Santi Martínez: Vila-Sana empezou cun forte ritmo, quería sentenciar pronto. Nós estivemos a tentar conter este arranque tan forte e adaptarnos á pista, moi rápida e curta en comparación coa nosa. Non estivemos finas neses minutos e as locais impuxeron o seu dominio nestes momentos iniciais con dous goles.
A partir do segundo gol cambiou o partido, cando parecía que Vila-Sana íase a levar de maneira cómoda o partido, foi cando mellor estivemos nós, máis asentadas, e logrando empatar. Desde este momento o partido foi unha toma e daca, con máis dominio das catalás, pero con constantes chegadas nosas á meta contraria, tendo mesmo nos tres minutos finais varias ocasións claras de marcar.
O adestrador do HC Borbolla destaca: “Non xogamos demasiado ben, pero fomos capaces de competir fronte a fronte contra un gran equipo, feito para loitar polos postos de arriba e que posúe un grupo de moi boas xogadoras”
Santi Martínez: “As nosas únicas contas son as de ganar cada partido”
As Nosas: Gañan Areces e Igualada, ao Alcorcón e Cuencas Mineras, respectivamente, e empatan Vilanova e Girona. A xornada colócavos sextas na táboa a dous puntos dos postos de salvación. Supoño que facedes contas…
Santi Martínez: Contas… As nosas únicas contas son as de tentar ganar cada partido que xogamos. Aínda que todo está moi igualado e é moi pronto para botar contas, sabemos que do mesmo xeito que case todos os equipos desta segunda fase, dependemos de nós mesmos para obter a permanencia na categoría.
As Nosas: Tras o partido, algunha baixa para recibir ao Areces Ecopilas Arturhockey?
Santi Martínez: Para o partido do próximo sábado, en principio, só contamos coa baixa de Julia por acumulación de cartóns.
As Nosas: Só cabe gañar por moito que elas veñan de imporse ao CP Alcorcón.
Santi Martínez: A estas alturas do campionato só válenos a vitoria en cada un dos partidos que xoguemos, así que é como nos tomaremos o deste sábado. É unha obviedad pero, cantos máis puntos logremos en cada partido, máis preto estaremos do noso obxectivo que non é outro que lograr a permanencia na Ok Liga.
Así, o seguinte asalto desta pelexa por manter a categoría será no pavillón de Monte Alto, o vindeiro sábado 27 de febreiro ás 19. O rival, o Areces Ecopilas Arturhockey. Como admite o adestrador das tomatitas, so vale gañar.
O HC Borbolla acariña a fazaña pero remata perdendo 3-2 co Vila-Sana
