Ao fronte do banco do HC Borbolla está un ano máis o técnico de hoquei a patíns Santi Martínez. O preparador das xogadoras coruñesas sabe da importancia de acadar o tan ansiado primeiro triunfo que libere tensións e faga que as galegas empecen a sumar nesta OkLiga 2020 – 2021.
SILVIA CARREGAL: Para o partido co Cerdanyola, tendes baixas?
SANTI MARTÍNEZ: Por sorte, non. Non temos baixas.
SILVIA CARREGAL: Como foi o traballo do Hockey Club Borbolla desta semana?
SANTI MARTÍNEZ: Pois unha semana máis estivemos intentando correxir os puntos nos que podemos estar un pouco máis febles.
SILVIA CARREGAL: Incidíchedes nestes días nalgún aspecto do xogo en concreto para mellorar o rendemento?
SANTI MARTÍNEZ: Concretamente, nesta semana incidimos nas axudas en defensa e no aproveitamento dos espazos en ataque.
SILVIA CARREGAL: Que opinión tes do rivall o Cerdanyola?
SANTI MARTÍNEZ: O Cerdanyola é un equipo moi potente. O ano pasado finalizou en terceira posición a competición. Teñen moita calidade, velocidade e fan as transicións rápidas. Nas súas filas hai xogadoras moi importantes tales como Joana Xicota, Adriana Gutiérrez o Daiana Silva.
SILVIA CARREGAL: De gañar sería un aliciente importante para o equipo conseguir ese primeira vitoria e sacudirse a tensión, non si?
SANTI MARTÍNEZ: Unha vitoria sería moi importante por varias cuestións. Unha delas é polo feito de acadar ese primeiro triunfo que nos daría maior tranquilidade. Outra das razóns é polo puntos que xa son moi necesarios para o HC Borbolla. E o terceiro motivo é polo feito de que unha vitori ante un equipo tan potente como o Cerdanyola daríanos, a parte dos puntos, un plus de confianza.
As herculinas do HC Borbolla reciben ao Cerdanyola CH ás 12:00 horas do domingo 18/10/2020, no pavillón de Monte Alto. Hockey Global, un dos patrocinadores das galegas, transmitirá o partido na súa canle de YouTube.