A tempada 2022/2023 da liga Iberdrola de rugby comeza mañá sábado 1 de outubro co CRAT Residencia Rialta exercendo de anfitrión diante o Sant Cugat.
O partido será ás 16 h no Estadio Universitario de Elviña. As coruñesas, sextas a pasada campaña, terán enfronte a un rival que o ano pasado finalizou o curso só un posto por baixo delas. Será un bo reto para comprobar como se axustan os reforzos en partido oficial, pois tan só puideron probarse no triunfo diante El Salvador nun amigable en Valladolid.
Os técnicos do CRAT Pakito Usero, Jos Portos e Juan Carlos Fernández, tentarán empezar con bo pé unha tempada na que se pretende non pasar apuros para manter a categoría como na pasada, senón que o obxectivo, se respectan as lesións, é entrar nas eliminatorias polo título.
Desde que en 2019 conquistaron o seu segundo título ligueiro, as herculinas non logran clasificarse para os playoffs. A iso axudarán as caras novas: Valle Viñas, Leire Gorrotxategi, Alba Martínez, o regreso de Elsa Porto, a portuguesa Maria Morant, as neerlandesas Quen Makkinga, Nicky Dix e Kyra Elzinga e a neozelandesa Sina Hetet.
O CRAT Residencia Rialta, con 21 tempadas na máxima categoría, só é superado polo Majadahonda, que disputou 27. Esta é á décimo terceira campaña das de negro e azul desde que a División de Honra recibe esa denominación, non sumando nin un só descenso desde entón. As baixas por lesión condicionan a primeira convocatoria oficial do CRAT este curso.
Lista de convocadas do CRAT ante o Sant Cugat
Jos, Pakito e Juan Carlos contarán para o choque de mañá fronte ao Sant Cugat con: Ali, Barbi, Carla, Nicky, Pimi, Kyra, Maria, Miriam, Divi, Copi, Maitane, Judith, Sina Hetet; Alba Lalín, Anita, Leire, Alejandra; Tania, Quen, Ceci, Ronsel, Alevín e Elsa.
Pola súa banda, o Sant Cugat é un conxunto con moita menos experiencia na elite. As catalás, que comparten cores coas galegas, cumpren a súa segunda tempada na liga Iberdrola. E nas súas vitrinas só hai un trofeo a nivel estatal, a Copa da Raíña de sevens que gañaron, precisamente, na Coruña este ano e con Elsa, esta campaña de volta no CRAT Residencia Rialta, nas súas filas. A da Rúa é unha das principais baixas para o Sant Cugat, con incorporacións de xogadoras españolas exclusivamente.
As catalás saíron vitoriosas dos dous amigables que disputaron esta pretemporada contra Cisneros e BUC Barcelona. Aínda que o seu obxectivo é lograr a permanencia por segundo ano consecutivo, os triunfos previos ao comezo liga enchen de optimismo o horizonte do Sant Cugat.
