“Non imos baixar os brazos en ningún momento, as xogadoras non o fixeron nunca. Elas son as que nos van sacar disto e son capaces de facelo. Non teño ningunha dúbida”. Así resume Manu Sánchez, adestrador do Dépor ABANCA, a súa fe cega nas xogadoras branquiazuis, malia acumular xa sete derrotas e ningún punto, no que vai de Primera Iberdrola.
Os resultados non acompañan ás deportivistas. Con todo, Sánchez incide na importancia de que as futbolistas crean “nas súas posibilidades, porque as hai, son reais”. Para o adestrador, a clave para rematar esta mala racha pasa pola mentalidade das xogadoras “que ao final son as que saen ao campo a defender o noso escudo. Teño plena confianza en todas e cada unha delas e así o estamos a transmitir. Temos que seguir confiando porque o acerto poder aparecer ou non, pero o talento non desaparece e aquí hai talento”, declarou contundentemente.
Uns inicios “complicados”, en palabras de Sánchez
Este inicio de tempada “complicado”, que non delicado, en palabras do técnico, ten de todas formas aspectos positivos. O principal é o “espirito de loita que ten o equipo, de tirar cara adiante malia as adversidades. Non perder a fe”, características que definen ao sello de identidade do Dépor ABANCA.
Sen dúbida, se este vestiario se caracteriza por algo, é pola súa unidade. Manu Sánchez ten moi claro que o seu traballo “é tratar de guialas, de provocar os escenarios máis favorables para elas e confiar cegamente nelas. Isto será así ata o final, en min non van ter nunca nin un inimigo, nin un ditador. Van ter a alguén que sempre vai apoiar e sumar”.
Sánchez admite que a psicoloxía inflúe, pero entende que os erros “non se poden analizar dunha forma tan abstracta. Os erros son evidentes, estamos a cometer reiteradamente certas situacións no campo que son as que nos penan. Eso o saben as xogadoras, está valorado e é o que temos que arranxar. Sería moi sinxelo pola nosa parte aludir á cuestión mental, que inflúe, pero non é o principal. O principal é o verde e o traballo das xogadoras nel”.
Sete intentos de remontada que fracasaron
Unhas das principais pedras no camiño que están a sufrir as xogadoras son os goles tempraneiros. “Estamos a xogar todos os partidos practicamente desde os primeiros minutos tratando de facer unha remontada”, analiza Sánchez. Unha dificultade que está a marcar o desenvolvemento dos encontros xa que “é imposible xogar sete partidos tratando de remontar un resultado desde o inicio. Temos que tratar de cortar esa sangría de que nos marquen goles ao inicio ou tratar de marcar nós antes”.
Ademais, a esta mala sorte nos primeiros minutos súmase a dificultade de prepararse ante este tipo de situacións. “Cando preparase un partido o preparas completo, non tratando de evitar que marquen no inicio. Este é un tema de concentración e acerto” reflexiona Sánchez.
Foi o caso do último encontro, fronte ao Levante, cando o Dépor ABANCA recibiu un gol no minuto tres e outro no nove. “O primeiro gol é unha acción que sabemos que pode acudir e qué facer para evitalo, niso é no que temos que incidir. O segundo gol foi de rechace, algo que é difícil de plantexar para evitalo. Hai que incidir na concentración e evitar estas ocasións para que non se den. A semana pasada contra o Sevilla o logramos pero nista non foi así”, analiza Sánchez.
O técnico deportivista admite que o plantexamento inicial do equipo estaba deseñado para un tipo de xogo moi específico que non está a funcionar así que “agora estamos traballando para conseguir outro tipo de obxectivos e comportamentos no campo que nos costan, porque se saen bastante da nosa esencia”.
Sánchez admite que queda traballo por facer neste aspecto e que “todo é mellorable, temos que facer moita autocrítica, o primeiro eu, e modificar esas actitudes que temos ante diversas accións que non estamos acostumadas a recibir”. A Liga cambiou respecto a outras tempadas, xa que este curso é “moi intensa e moi física”, así que este é outro aspecto para ter en conta á hora de adestrar.
Os erros repetíronse contra o Levante
A derrota fronte ao Levante rematou cun catro a un a favor das locais. Con todo, Sánchez móstrase contento co esforzo das súas xogadoras “con catro goles en contra dun dos maiores orzamentos da categoría, o equipo acabou chegando á area rival. Iso é o que temos que seguir reforzando”, declarou.
A idea inicial do técnico branquiazul era a de lograr solidez e seguridade na liña de defensa utilizando a tres centrais. Desta forma, a idea era que se facilitase a saída de balón, pero o equipo non o logrou. “O plantexamento do partido viuse abaixo en 8 minutos, pero decidimos non tocar nada ata o descanso porque podía ser máis perxudicial para as xogadoras. Co marcador en contra é difícil avaliar e valorar o traballo e que as propias xogadoras se decaten do que están a facer ben”, explica Sánchez.
O técnico deciciu non trocar a ningunha xogadora ata o minuto 65, cando cambiou a Michelle Romero por Helena, debido a que o adestrador entende que “desde o banquillo pode dar a impresión de que hai que trocar moitas cousas e a percepción das propias xogadoras no partido é diferente. O que tentábamos era reforzar a súa mentalidade, o traballo que estaba previsto facer e que non deu froitos ao principio”.
Preguntado pola exclusión de Iris Arnaiz do once inicial, o adestrador aclarou quese tratou dunha decisión técnica, e que “as xogadoras saben cando e porqué xogan ou non. Non hai ningún tipo de problema extradeportivo ou persoal. O que tente buscar ese tipo de argalladas no Dépor ABANCA non as vai atopar, porque imos todos a unha”.
Xa poñendo a mirada no próximo rival, o Atlético de Madrid, Sánchez insiste en que a importancia para o seu equipo agora mesmo pasa por puntuar, independentemente do equipo ao que se enfronten. “Estamos ante un dos grandes da categoría, pero temos que ir a polo partido como se non fose así. Para nós é máis importante sumar puntos que preocuparnos pola entidade do rival que teñamos enfronte. Temos que facelas crer (ás xogadoras herculinas) que é posible, que este tipo de cousas xa as fixemos, non é algo novo para nós. Temos que saír o domingo a polos tres puntos. Non hai máis”. O Atlético visitará ABANCA Riazor o domingo, 22 de novembro, ás 16:15 horas.
