O Dépor ABANCA traballa semana a semana nas xogadas, estudando aos rivais e analizando os erros propios para mellorar, pero polo de agora, sen resultados. “Estamos movendo todo o que podemos e o que está na nosa man para conseguir un cambio”, admite o seu adestrador, Manu Sánchez. Pero os cambios, e os puntos, non chegan.
Na última xornada as branquiazuis non lograron controlar ao rival, un Levante UDF que ocupa a posición de prata por debaixo do FC Barcelona.
Esta é a cuarta derrota consecutiva que sufren as pupilas de Manu Sánchez, que non coñecen a vitoria desde a xornada 11, co 2-1 ante o EDF Logroño. Desde entón e sete partidos despois, dous deles adiados, as branquiazuis non levantan a cabeza, pero están a seis puntos de saír da zona vermella.
O Dépor ABANCA de Sánchez non traduce os cambios en puntos
Algo que “é complexo”, declara Sánchez. O técnico recorda que no equipo están facendo todo o que pode para dar coa tecla que traiga os resultados positivos. “Estamos trocando moitas cousas, nos adestramentos, nos plantexamento dos partidos, cambia incluso a nosa forma de analizar e de ver os partidos nosos como dos rivais”, sinala o adestrador.
Manu Sánchez: “O equipo acabou o partido moi enteiro. O que falta para referendar todo isto é ter resultados, se non, parece que todo o que fas non vale para nada”
A situación actual do Dépor ABANCA non bloquea ao míster, que considera que estas melloras puideron verse xa no campo no último partido, “un cambio que fixemos na parte física e o equipo acabou o partido moi enteiro. O que falta para referendar todo isto é ter resultados, se non, parece que todo o que fas non vale para nada. Penso que non é así. Na rolda de prensa de onte (polo sábado) xa dicía que o equipo non estaba tan mal como parecía e o visto no campo creo que é un reflexo”, declarou o técnico.
Rendirse non entra no vocabulario do adestrador herculino, que asegura que “seguiremos trocando, seguiremos movendo, seguiremos reforzando e tratando de encontrar o mellor camiño para que elas consigan levarnos á vitoria”.
Posibles incorporacións
Este luns, 1 de febreiro, pechou o mercado de inverno, e o Dépor ABANCA precisa sangue fresco no equipo tras a marcha de xogadoras como Lía. O técnico explica que está contento co rendemento das súas xogadoras, pero Sánchez recorda que reforzar o conxunto aumentando o número de futbolistas sería positivo.
Manu Sánchez: “Se ven algo ao equipo axudaranos e se non, tiraremos co que hai, pero non será ningunha excusa para pelexar”
“Estamos contentos coas que temos, pero si que mellorar ese número sería importante, pero polo menos temos o gran traballo que se está facendo no equipo B. Debutou unha xogadora máis e moi ben, María Figueroa. Se ven algo ao equipo axudaranos e se non, tiraremos co que hai, pero non será ningunha excusa para pelexar”, sentencia.
