Queda pouco máis dun mes para a San Silvestre de Pontevedra 2022 e xa se pode apuntar no calendario cando comezan as inscricións nesta cita deportiva, un clásico xa do Nadal na cidade do Lérez. Este ano o obxectivo da organización é superar as 7.000 persoas inscritas.
Desde a Sociedad Gimnástica de Pontevedra animamos “a todos os pontevedreses/as e veciños/as dos concellos limítrofes a participar na San Silvestre de Pontevedra 2022. Este ano buscamos superar o noso récord do 2019, cando fomos 7.000 inscritos“, explican.
Neste final de 2022 a carreira San Silvestre de Pontevedra volve ás rúas da Cidade de Pontevedra, e con ela volverán as cores, a ilusión, os disfraces e a festa que tanto definen este evento.
As inscricións na San Silvestre de Pontevedra 2022 realizaranse na planta de arriba do Mercado de Abastos co seguinte horario e datas:
- Do martes 20 ao 23 de decembro: de 17:30h a 20:30h.
- Do luns 26 ao venres 30 de decembro: de 10:30h a 13:30h e de 17:30h a 20:30h.
- O sábado 31 de decembro de 10:30h a 13:30h.
Polo tanto, tras varios anos onde a xente se apuntaba na Casa da Luz ou en Miler Vintage Running Club, este ano a organización muda o lugar de inscrición “estaremos no Mercado de Abastos. É un dos edificios máis emblemáticos da cidade de Pontevedra, ás beiras do Lérez”, explican.
Inscricións de balde na San Silvestre de Pontevedra pero doazón ao Banco de Alimentos
As inscricións serán gratuítas. Cada participante terá que levar un dorsal visible no peito. Estas identificacións serán obrigatorias para optar aos diferentes premios e agasallos que se entregarán.
Aínda que a inscrición sexa de balde, advírtese desde a Sociedad Gimnástica de Pontevedra que “no momento de recoller o dorsal, haberá que entregar produtos de alimentación imperecedoiros, polo menos un quilogramo, para doar ao Banco de Alimentos de Pontevedra”.
Ademais, dende a Sociedad Gimnástica de Pontevedra, entidade organizadora da carreira San Silvestre de Pontevedra 2022, agradécese “a aportación voluntaria de 1€ por cada dorsal para apoiar a labor do noso club na promoción do atletismo na nosa comarca”, trasladan.
