- A San Silvestre Coruña presentouse no Palacio dos Deportes, coa presenza de David Iglesias, Diana Sobral Cabanas, José Ulfe Bugallo e César Carballeira.
- Na carreira en categoría absoluta xa se superaron os 4.100 participantes.
Xogadores e xogadoras de todas as categorías do HC Deportivo Liceo, que este ano celebra o seu primeiro medio século de vida, serán os encargados de dar a saída á XIII San Silvestre Coruña o próximo 31 de decembro. A cita é no O Parrote, ás 16.45 horas.
A carreira foi presentada no Palacio dos Deportes de Riazor, coa presenza do organizador, David Iglesias, do Club Rialto; a concelleira do Concello da Coruña Diana Sobral Cabanas; José Ulfe Bugallo, de Abanca, e César Carballeira, en representación do HC Liceo.
David Iglesias valorou as boas cifras da proba, na que cada ano compiten un 20% de corredores de fóra da cidade da Coruña, o que supón, na súa opinión, un importante atractivo turístico para a cidade. O organizador da San Silvestre Coruña falou tamén dunha das novidades deste ano, que é a inclusión dunha nova categoría, a de marcha nórdica, que se engade ás xa existentes, e na que se tiveron que volver abrir as inscricións, que quedaron esgotadas nunha primeira quenda.
Pola súa banda, a concelleira Diana Sobral Cabanas, en representación do Concello da Coruña, destacou a alta participación tamén nas probas infantís, nas que tamén se tiveron que volver abrir as inscricións ata en dúas ocasións, e que xuntarán na chaira de O Parrote, ás 16.00 horas do próximo 31 de decembro, a máis de 200 nenos e nenas con idades comprendidas entre os 7 e os 10 anos.
Datos de participacion na San Silvestre Coruña 2022
Na carreira en categoría absoluta da San Silvestre Coruña xa se superaron os 4.100 participantes. As últimas 400 prazas dispoñibles xa só son accesibles mediante inscrición en liña en sansilvestrecoruna.com ou en championchipnorte.com ata o próximo 26 de decembro, salvo que se esgoten antes.
A proba sairá de O Parrote e discorrerá pola Mariña ata Juana de Vega e logo polo Paseo Marítimo para regresar de novo ao Parrote. Para quen non poidan participar de forma presencial, continúan os retos virtuais iniciados en 2020 na app, como as diversas etapas do Camiño Inglés.
Para quen non poidan estar na proba presencial existe a posibilidade, do mesmo xeito que en anos anteriores, de seguir outros percorridos de forma virtual unha iniciativa que comezou en 2020. Este ano é posible realizar tres probas: Camiño Inglés, Santiago-Fisterra e o Roteiro dous Faros. As tres están dispoñibles na app da San Silvestre Coruña, que se pode descargar para Apple ou Android.
Deporte e solidariedade
A proba mantén en 2022 o seu carácter solidario, co apoio a dous proxectos. Por unha banda, recóllense alimentos para a Cocina Económica, (con puntos de recollida durante a entrega de dorsais e o mesmo día da carreira), pero tamén colabora co proxecto Reis Magos de verdade, no que se recollen cartas de rapazada e maiores para que quen desexe colaborar poidan converterse en paxes das súas Maxestades de Oriente para levar agasallos e sorrisos a quen máis o necesitan. Quen desexe colaborar con esta iniciativa pode facelo apuntándose na páxina web www.reyesmagosdeverdad.org.
Ademais, na súa intención de ser unha carreira integradora, a San Silvestre Coruña dispón de “dorsais solidarios” de apoio aos corredores e corredoras con capacidades especiais que o necesiten.
Categorías da carreira máis divertida do ano
Na San Silvestre Coruña hai dez categorías deportivas, divididas en dous infantís, dous xuvenís e seis absolutas, ademais da de marcha nórdica e a de empresas, que se obtén sumando os tempos dos corredores da mesma organización. Tamén hai dous premios ao mellor disfrace, individual e colectivo.
A XIII San Silvestre Coruña está organizada por Club Rialto, coa colaboración do Concello da Coruña.
