O pasado domingo, as pistas municipais de Balaídos, en Vigo, viviron unha xornada plena de atletismo, co Campionato de Galicia Sub-14 na xornada de mañá e o Campionato de Galicia Máster por clubs pola tarde. No segunto torneo, o Samertolameu resultou vencedor, gañando en case todas as probas femininas.
Dentro da categoría de veterás, o CA Sada subiu tamén ao podio, pero na segunda posición da táboa. A última medalla foi para o CD La Purísima, que resultou terceiro clasificado nas probas máster.
María de los Ángeles Rodríguez acada o récord español máster en 2.000 obstáculos
Coa vitoria do Samertolameu na competición feminina, este equipo toma o relevo do equivalente masculino, vencedor no an 2019. Nas categorías masculinas, o gañador desta edición foi o CA Sada, cunha prata para o Samertolameu e un bronce para o Atletismo Narón.
Dentro da competición de mulleres, o resultado máis destacable foi o récord de España F60 logrado pola atleta da Atlética A Silva, María de los Angeles Rodríguez na proba dos 2.000 obstáculos F60 cun rexistro de 10:22.73.
⚠Récord Galego Máster 60 para Mª DE LOS ÁNGELES RODRÍGUEZ DEL RÍO da @atletica_a na proba dos 2.000 Obs. con 10:22.73 ocurridos durante a disputa do Campionato de Galicia Máster por Clubs desenvolto en Vigo o pasado día 26 de xuño
💪PARABÉNS!https://t.co/DWZAspYXbU pic.twitter.com/qw3GHWjEna— Atletismo Galego (@atletismogalego) June 28, 2021
Por parte do Club Atletismo Sada, María Luisa Armesto competiu na F70 en xavelina cunha marca de 11,89 m., mentres que Cristina Estévez, do A.F.Celta, fíxoo no F45 na proba dos 2.000 Obstáculos con 8:13.28. Finalmente, aínda dentro dos máster, Loreto Brea, da SG Pontevedra, na F45 en martelo con 37,16 m. tamén logrou un récord autonómico.
As atletas vencedoras Sub-14
Durante a mañá disputouse o Campionato Sub-14, con reparto de medallas. No medio quilómetro, Jimena Outes, do Coruña Comarca, venceu con 1:20.43. Sabela Castelo, do Vila de Cangas, proclamábase campioa galega dos 1.000 m. cun bo crono de 3:05.14 ao igual que María Estévez, da Atlética A Silva, nos 1.000 obstáculos con 3:35.00.
Segundo informa a Federación Galega de Atletismo, na categoría de saltos os resultados máis salientables foron para a atleta da CD La Purísima, Iria Solera quen chegaba ata o 1,53 m. en altura así como os 2.51 m. en pértega de Helena Bello, do Vila de Cangas.
Dentro dos lanzamentos, Antía Otero impoñíase tanto no concurso de peso con 9.07 m. como en xavelina con 27.92 m. tendo o lanzamento de disco a Noa Romero, do Narón, como a dominadora cun salientable lanzamento de 25.85. A líder do ránking nacional en martelo Marta Hermida, do A.F. Celta, non daba opcións no concurso en martelo de 2 kg., vencendo con 50.65 m.
