- O Concello da Coruña ofrece, en colaboración coa FESSGA, actividades formativas en salvamento para nenas e nenos de 4 a 16 anos
Hoxe, luns 3 de xullo, o Concello da Coruña comezará a nova tempada estival de actividades formativas en salvamento deportivo, unha iniciativa promovida a través dun acordo establecido coa Federación de Salvamento e Socorrismo (FESSGA) e orientada especificamente a nenas e nenos de entre 4 e 16 anos.
O plan de actividades terá continuidade ata o día 15 de setembro (data de peche da tempada de praias na Coruña), e levarase a cabo de luns a venres nos areais de Riazor, Orzán e Oza, en espazos controlados onde o persoal de socorrismo instruirá as pequenas e pequenos en técnicas de salvamento e adestramento en termos de vixilancia, tanto en terra como no medio acuático.
Neste sentido, a rapazada poderá achegarse polo miúdo aos procedementos de rescate e tamén a manobras como a técnica de reanimación cardiopulmonar (RCP), esencial en caso de emerxencia.
Haberá un total de catro sesións diarias por praia: dúas en horario de mañá (entre as 11.30 e as 14.30 horas) e outras dúas en horario de tarde (entre as 16.00 e 19.30 horas). Cada sesión terá uha duración de hora e media.
A inscrición das e dos menores nas actividades programadas poderá levarse a cabo por dúas vías: de forma presencial, acudindo aos propios postos de socorrismo de Riazor, Orzán e Oza minutos antes de cada sesión, ou ben rexistrando a solicitude a través da páxina web da FESSGA, na seguinte ligazón.
Tanto a inscrición como a asistencia ás actividades será de balde. Desta forma, o Concello da Coruña pretende contribuír á posta en valor do traballo do servizo de salvamento e emerxencias na tempada de praias, implicando as novas xeracións no coñecemento e desenvolvemento do seu día a día.
