O Campionato de España Máster de pista cuberta, celebrado en Ourense, destacou polo talento do atletismo galego. O Club Atletismo Sada foi o segundo equipo clasificado por clubs, con ata 22 medallas, e Esther Pedrosa volveu a acadar un récord mundial, o terceiro neste mes.
Entre as atletas do Sada estivo Pilar Barreiro, quen a última vez que estivera nesta pista sufriu unha lesión, pouco antes do inicio da pandemia. Agora, a atleta volveu máis forte, sumando dous bronces e un ouro. “Este ano reconcilieime con Ourense e creo que me compensou. Deume a alegría que me quitara”, declara a As Nosas.
Éxito no CA Sada
Á fin do campionato máster, o Club Atletismo Sada sumaba 22 medallas, 16 delas femininas, sendo cinco ouros, catro pratas e sete bronces. Un deses ouros foi en relevos mixtos, cun equipo formado por Fernando Míguez, Montse Fernández, Jacinto Parga e a propia Pilar Barreiro. Tres deles forman ademais parte da directiva.
“O bo do club é que a directiva predica co exemplo. Hai clubs que teñen unha directiva que esta nun despacho ou que non sente ou padece a pista. O noso presidente foi campión de España de triplo salto e no relevo tamén estaba eu, que tamén estou na directiva. Sufrimos o mesmo que os demais e creo que iso nos une a todos moito máis”, sinala Barreiro.
Atletismo galego exemplar, con Pedrosa batendo un novo récord mundial
Ademais do éxito do Sada, o resto do atletismo galego non quedou atrás. A excelente actuación a nivel xeral, viuse acompañada polo gran campionato dos atletas galegos que en un número de 219 acudiron a Ourense como a delegación máis numerosa.
Da súas actuacións sairían nada menos que un récord do mundo, tres récords de España, vintedous récords galegos, corenta e tres medallas de ouro, trinta e cinco pratas e trinta e un bronces, que en termos absolutos representa o mellor balance de todas cantas Comunidades acudiron a disputar o evento estatal.
Novamente, Esther Pedrosa foi unha das grandes protagonistas desta edición. A atleta compostelá lograba xa na xornada inaugural do venres un novo récord mundial sobre a proba dos 3.000 F60 mellorando a súa propia plusmarca ata deixala en 10:08.45. Con este novo rexistro xa son tres os récords mundiais batidos pola corredora internacional en apenas dous meses Para rematar e como colofón, o domingo sumaba outro título e récord nacional sobre a proba dos 1.500 m. con 5:15.00.
Ver esta publicación en Instagram
O resto de récords veu da man de equipo de relevos F55 do propio Club Atletismo Sada quen sobre os 4×200 m. lograban o titulo e o récord nacional con 2:07.58.
Como informa a Federación Galega de Atletismo, un total de 109 medallas serían as logradas polos nosos atletas entre as que destacan os dous ouros logrados polo atleta do Atletismo Sada M40 Daniel Giménez nos concursos de altura e lonxitude; Basi Bernárdez de A Silva na M45 en triplo e lonxitude; Rosario Sureda do Lucus Caixa Rual Galega na F55 en altura e 200 m.; Esther Pedrosa do Playas de Castellón na F60 sobre os 3.000 m. e nos 1.500 m.; Carlos Ferrer do Atletismo Narón na M60 sobre os 60 valos e o Pentathlon e Domingo Álvarez do Burgas Ourense na M65 sobre os 400 m. e os 800 m.
